Жан харж дангу яхI бикIан аьркинссар

Шин ххишалагу ларгунни бусалдаравун агьсса МахIаммад НурбахIандов дунияллия лавгун.

Ца-кIива зурул хьхьичI Виричунал нитти-буттачIан Серго­къалаллал райондалийн увкIун ­уссия Аьрасатнал Федерал Мажлисрал ПаччахIлугърал Думалул депутат Юрий Левицкий.
Вай гьантрай Юрий Левицкий цIунилгу увкIунни Сергокъалалив. Ва ххуллух ванащал бия Дагъусттаннал Виваллил иширттал министр Аьбдурашид МахIаммадов, респуб­ликалул Халкьуннал Мажлисрал депутат Артур Шахнавазов, Халкьуннал МажлисрачIасса Жагьилтурал парламентрал вакил Алина АхIматзянова. Райондалул администрациялул актовый залданувун бавтIунни райондалул актив. Сергокъалаллал райондалул БакIчи МахIаммад Оьмаровлул махъ буллунни Юрий Левицкийхьхьун.
— Шин, ххишалагу ларгунни полициялул лейтенант МахIаммад НурбахIандовлул цIа щалагу билаятрай машгьур хьуния шихуннай.
ХIакьину жува бавтIун буру къачагътурал канища ивкIусса жула Виричу дакIнийн утан. Махъва-махъсса ссихIирачIагу нигьа къаувсун, къачагътурал тIутIимур къабувну, «Зузияра, уссурвал» увку­ссар цала коллегахъахь МахIаммад НурбахIандовлул. Ванал къучагъшиврул чIалачIи дурссар циняв­ппагу виваллил иширттал органнал зузалтрал къучагъшиву, жула жагьилтурал патриотизм.
НурбахIандовлул цIа дизлай бур кIичIираваллан, муная чичлай бур назмурду, тIий бур балайрду, художниктурал дихьлай бур суратру. Аьра­сатнал шагьрурдая букIлай бур барчаллагь тIисса ча­гъарду Виричунал нитти-буттачIан. Уттигъанну на хьунаавкьура Аьрасатнал Федерал Мажлисрал ПаччахIлугърал Думалул председатель Вячеслав Володиннущал. Мунал лавай­сса кьимат бивщунни МахIаммад НурбахIандовлул къучагъшиврун. Тавакъю бунни мунал нитти-буттахь барчаллагь тIисса ча­гъар биян бан. ХIакьину на ттуйнма тапшур бувмур щаллу бан увкIра, — увкунни Юрий Левицкийл ва був­ккунни чагъарданий чивчумур.
— ХIурмат бусса НурбахIанд МахIаммадович ва Кумсият АьбдурахIимовна. Зул арснал виричунал кунна жан дуллуссар. Мунал махъва-махъсса махъру абадлий дакIний бикIантIиссар щалагу билаятрал агьулданун. Барчаллагь тIий ура зухь къучагъсса арс, хIакьсса патриот тарбия аврихлу. МахIаммад ивкIссар ххаллилсса арсгу, ласгу, ппугу. Му дунияллия лавгссар ник къарирщуну, бакI кьус къариртун».
Хъирив ихтилат бувсса Аьбдурашид МахIаммадовлул бувсунни МахIаммад НурбахIандов оьрмулуцIа увсса къачагътал бат бувсса куц, та кьини вацIлуву хьумур ашкара хьусса куц, бувсунни Сергокъалаллал район паракьатсса райондалун ккаллину душиву ва ихтиярду дуруччай органнан хъирив бизан багьсса тай ишру ва райондалуцIун бавкьусса бакъашиву. Министрнал кIицI лавгунни, Виричунал нитти-буттащал кIул хьу­сса чIумал бувчIушиву цанма укунсса кулпатраву тарбия ларсъсса арс цамур куццуйсса икIан къабю­хъайшиву.
— Виваллил иширттал органнал зузалт МахIаммад кунма къуллугърайн хаин къавхьуну, дакI марцIну бартбигьлантIиссар цала буржру, — увкунни ванал.
— Виричушиву дяъвирду бакъа­сса, паракьатсса чIумалгу дан шай­ссар. Му мяйжан бунни уссурвал НурбахIандовхъал. МахIаммад ва Аьбдурашид хъанахъиссар къучагъшиврул ва Ватан ххирашиврул эбратну.
Кув инсантал лагайссар дунияллия лахъисса оьрму бувтун, амма цува дакIний икIансса цичIар къакьариртун, кувгу виртталну, оьрчIалгу, щала билаятрал агьулданулгу пахру банну, — увкунни Артур Шахнавазовлул. КIулшивуртту дулаврил управлениялул хъунмур Ханум Исяевал бувсунни райондалий цуксса къулагъасралун лавсун буссарив оьрчIру Ватан ххирану тарбия баврил масъала.
Ахирданий Виричунал буттал НурбахIандлул барчаллагь увкунни захIматсса чIумал цала дакI данмур буллай, чIарав бавцIусса цинявннахь — Аьрасатнал Президент Владимир Путиннуя тIайла хьуну, билаятрал гьарица мурцIнийсса дуклаки оьрчIайн бияннин. Барчаллагь увкунни Юрий Левицкийхь, Вячеслав Володиннухь, мукунма ДР-лул БакIчи Рамазан АьбдуллатIиповлухь.
— Жул арс зана къахьунссар, амма чIарав дакI цIуцIисса инсантал буний, жун жула къюву лялиян дан цахъи бунугу бигьану бур, — увкунни ванал. НурбахIандлул бувсунни МахIаммадлун футбол ххирасса бивкIшиву, Сергокъалалив футболданий буккансса авлахъ бан хияллай ивкIшиву ва барчаллагь увкунни мунан дакIний бивкIмур бартбигьин хIарачат бувсса Артур Шахнавазовлухь.
Хъирив цинявппа бивунни виричу дуклай ивкIсса школалийн. Юрий Левицкийл ва Аьбдурашид МахIаммадовлул тIутIив дирхьунни МахIаммад НурбахIандовлул мемориалданул улалучIа.