Августрал 8-нний «Машук-17» тIисса Ухссавнил Ккавкказуллал жагьилтурал форумрай хьунни Дагъусттан Респуб­ликалул Кьини. МуницIун бавхIуну форумрайн увкIунни ДР-лул ХIукуматрал Председательнал 1-ма хъиривчу Анатолий Карибов. Ганал форумрай гьуртту хьуминнахь бунни Дагъусттаннал БакIчинал цIаниятусса аьла-ссалам ва кIицI бунни «Машук» форумрал хъуннасса мяъна душиву региондалул жагьилтуран.

«Форум бавцIуну бур ца дастталий билаятрал хъунисса площадкарттащал архIал. Жула билаятрай ляличIисса къулагъас дуллай бур жагьилтурал политикалух, дузал дуллай бур жагьилтал давурттал щаллу баврин хасъсса, оьрмулуву цалвами ххуллурду лякъин кумагран­сса программартту, проектру. Ми проектру инсантурал аьркин дуллайгу бур цалва оьрмурду ххуй баву мурадрай», — увкунни Анатолий Карибовлул.
Форумрал гьурттучитал Да­гъусттаннал миллатирттал багьу-бизулущал ва культуралущал кIул баншиврул, жулла республикалия бувкIун бия 9 райондалул вакилтал. Усттартурал цащалла ларсун дия Бархъаллал тIахIунттив, оьрчIал чIюлушиннарду, табасараннал бартбисуртту ва цаймигу затру.
Дагъусттаннал делегациялул бакIчи МахIаммад Аьбдуллаевлул бувсунни гьарца шинах форумрайн бучIайсса бушиву ттуршахъул жагьилтал.
Дагъусттаннал Кьини хъун дан форумрайн бувкIун бия ДР-лул Халкьуннал Мажлисрал Миллатирттал арардал, жяматийсса ва диннал иширттал комитетрал председательнал хъиривчу Мадина Котенко, ДР-лул жагьилтурал иширттал министр Арсен ХIажиев, мунал хъиривчу МахIаммад Маликов ва цаймигу.
Форумрал хъамаллуращал ххал бивгьунни республикалий ишбажаранчишиву ва туризм лядуккан даврил ва цаймигу масъалартту.

ХIадур бувссар
ХI. Аьдиловлул