Жу, 1985 шинал 1-мур ЦIувкI­рав школа къуртал бувминнал, сайки тачIаврагу хIура дуккан къариртссар кувннал кувннащалсса арарду.

Жул класс дуккавриву итххявхсса, спортрал тIуркIурдаву ва захIматрал ккаккиярттаву хьхьичIунсса буссия. Микку хъунмур биялагу жухь дарс дирхьусса учительтурал бия. Цаннал цIа кIицI ларгун, гама кьаитан къахьунссар, циняв­ппа учительтал дуклаки оьрчIай дакI цIуцIаву дусса бия. Ца шяраву бухьувкун, мудангу учительтурал итталу буну, миннан жу бивзсса гьарца ша кIулнугу бакъарив! Нитти- буттахъулгу жул дуккаврил ва низамрал ялув цIакьну бавцIуну бия. Гьарцагу нитти — буттал зумувсса калимая: «Дарсругу лархьхьуну давугу дувара!» Мажал бакъар , чIун дакъар тIутIаву багьанттуя. Учительтурангу, ичIувацириннангу кIулссия жул багьантту буний лекьан буван. ХIакьину ххуй­сса къуллугъирттай зузиссагу бур, бизнесрахун багьну, гьаз хьуссагу бур. БакIра- бакIрах гьарманал яхI бувну бур лажин кIялану чивун уккан. Тани мюрщисса буну, ччя-ччяни цачIу, чIарав щябикIан къахъанай бивкIун тIий, хъиривлахъу буван кунма, махъсса шиннардий жу мудан байранну цачIу дуллай, ду­ссухалтту буллай бивкIру. Укун­сса хьунабакьавурттал жуву кувннал кувннахсса ччаву цIакьгу, ягингу дувай. Вана, уттигъанну жу архIал лавгру буттал шяравун — Цалчинмур ЦIувкIрав, Щуну-Зунттул ухнилу , хьхьирияр 2300 метралул лахъну дирхьусса, дунияллийх машгьурсса пагьламантурал миналийн. Жул кьюкьлуву бия: Камчаткалий муси дуккай экспедициялий зузисса Айшат Кьурбанова; Къазахъисттанная, Гурьев шагьрулия, бувкIсса Индира Рамазанова, Москавлия бувкIсса Назира Халилбагова ва цуппагу, ванил лас Маликгу жущал архIал дуклай буссия, ташу бувсса ца вайри бусса жул классраву); МахIачкъалалия буссия Булбул Бакриева, Асият Дукиева, Минажат Багова; Гъумук жущал хIала бувххуна Тамара Жамалова ва Сарижатгу.
КIула жун бучIан къавхьуцириннал дакIругу жущалла душиву, хIатта ми жуйва дакIнихтуну мяшнугума бушиву. Интернетрал каширду бюхттулсса чIунну дуркIун духьувкун, жу шагьрурдайва ливчIсса архIал дуклай бивкIминнащал скайп­равух гъалгъа тIий, хIала був­ххун бивкIру. Мигу жулва цачIу, чIарав бусса кунма.
Шяравун бувкIсса кьинива жу лавгру жулва школалийн. Физкультуралул дарс дирхьуну, ххал буварду цуманал бюхъу цуксса хьхьара хьуну бурив. Кьюкьлуй бавцIуну дуварду зарядка. ДакIнийн бичарду жухьра дарсру дирхьусса циняв учительтал. ЛивтIуми учительтурал аьпа учарду. ДакI­нийн бичарду дунияллия лавгсса жулва одноклассникталгу: ХIамзаев Мусттапа, Абасов МахIаммадрамазан, Къалмаев Шарапи, Аьбидов МахIаммад. Хъирив кьини кIюрххилва лавгру хIатталлив, ливтIуцириннал гьаттардий алхIамгу бувккуну, гиччава лавгру бахьтта биялсса ххуллу бу­сса Чарабутлив­сса щайхтурал зияратрайн. Оьр­мулул бугьараминнал бувсмунийн бувну, бусурман дин кьамул дувара тIий бувкIсса аьраб­нал щайхтуращал цIувкIул дяъвилий бувккун, тамансса ­аьраб ливтIуну бур. Ми бувччу­сса кIанттайн совет заманнайгума занан бикIайва жул нитти­хъул. АлхIам бу­ккин, дуаьртту дуван. Жугу, ниттихъал аьдатрай ливтIуциригу дакIнийн бивчуну, жулла шяравалу цIуницIа цIулаганнав тIисса дуаьртту дуварду. Лавгру, оьрчIзаманнай кунма, кьуллалийн щин ласунгу, РатIув неххалчIапIи бувангу.
Хъирив гьантрай жу бивру ЦункIрав, ЭябакIуйн, Къакъайн , оьрчIний жува кку­ччу бувсса зунттурдал хъачI- бакIайн. БатIарду явш, ттуккул цIу. ДакIнийн бичарду учкъул оьрмулувасса хIазсса лахIзарду. ЦIакь хьун дувара Буттал кIан­ттух­сса ва кувннал кувннахсса ччаву. Яргсса асардал дуцIин дарду дакIру. Оьрмулухун хъа­макъабитансса лахIзарду дакIурдил хIужрардаву татан буварду.

ПатIимат Рамазанова