ЦIуллу-сагъшивруцIунсса маслихIатру

Атеро­склерозрансса халкьуннал даруртту

[dropcap]Х[/dropcap]ьхьичIва ва цIуцIаврил къашавай шайссия так оьрмулул бугьарами, утти тIурча, ва жагьилминнайгу дур. Чичинну цаппара маслихIатру цукун буруччин аьркинссарив ва цукун хъин дуллан аьркинссарив ва цIуцIаву.
-Цири му цурда атеросклероз?
Аьгъушиврул обмен зия хьувкун туннурдал чирттацIух салкьи шайссар холестерин (аьгъу­шиврул ккузри-бляшки). Вай ккузри гьарза хъанай ­оьттул туннурду къума шай­ссар, бюхъай­ссар бащангу. Мичча инсульт, инфарктгу шайссар (бакIравунсса тунну бащарча — инсульт, къюкIличIансса – инфаркт.

Цири бан аьркинсса?

-ХьхьичIва-хьхьичI ялув бацIияра зура канакисса дукралул. Дукра дукияра гьантлун мукьилла, махъра-махъ — утту бишин 3 ссятрал хьхьичI. Хъиннува ккашил хьуннин ацIларчагу нервардан, къюкIлин къахъинссар. Мукунна заралссар чурххан ххишаласса дукра дукавугу. Хъиннува бучмигу цала кIушиврул ялув бавцIуну бикIан аьркинссар.
-Хъиннува илтIа шавугу къахъинссар, нигьачIиссар къюкIлин.
-Чан дан аьркинссар аьгъушиву, махъаллил хьияра колбасирттая, аьгъусса дикIуя, хъунмасса % аьгъушиврул бусса накIлил продуктилуя. Дурагу ишла мадари маргарин. КIулну бикIияра накIливусса аьгъушиврул ялунгу чIяву байссар оьттувусса холестерин дикIувусса аьгъу­шиврулнияр.
-Нисиралгу гьаз байссар оьтту­вусса холестерин.
Амма нисгу, лагавугу, бартгу дурагу къаканайгу къабучIиссар. Канан аьркинссар аьгъушиву чан дурну.
-Атеросклероз думиннан, къюкIлил къашайминнан бучIи буллай бур канан «Омега-3» аьгъу­шиву – вайгу дусса дур зайтундалул (оливкалул), балу­гъирттал, туртул нагьливу. Аьлим­турал ххалбигьавурттайн бувну «Омега-3» аьгъушиву давлениялул къашавайминнангу хъин­сса дур.
-Мунияту маслихIат буллай бур аьгъушиврул авадансса хьхьирил балугъ: сельдь, тунец, скумбрия, макрель, палтус, лосось канан.
-Атеросклероз дусса инсаннан нюжмардий бучIиссар 2-4 ккунук канангу
-цIу чан бан аьркинссар, 5 гр. – цIил гьантлул кьаралли, атеросклероз дусса инсаннан. Мукунна хъинссар гьарца кIюрххил дачIра ххюттуйн 200-300 мл кIирисса щинал хIачIларча, вай щинал туннурдугу марцI байссар, аьркин дакъамургу чурххава дуккан дайссар. Канакияра чIярусса ахъулсса ва ахънилсса.
-Чан дувара нацIушиву: качар, кканпитIру, печенье, ппиринжрал ва манкалул ккулпалия дурсса дукрарду.
-Ххуйну чан байссар холестерин нехълул кIучIалттулгу (отруби) гьантлун гьассар 15гр. кIучIалттанул. БучIиссар вайннун кIанай дачIи –дачIи кило гьивчул, чIикIунтIалул, каландалул ягу къурул дукангу.
-Ялун чIалачIисса аьгъусса дикI кьукьияра дикIуя (гъаттарал, яттил) аьнакIул дикIуя ликкияра бурчу.
-ДикI шархьсса накь (бульон) дукра даннин хьхьичI дякъин дурну ялату дяркъусса аьгъушиврул къат дукьан аьркинссар, яла дайссар гайннуя дукра.
-Кокосрал ва пальмалул аьгъу­шиву хIала дурсса продуктылуя махъаллил шияра.
-Ишла дуллалияра аьгъушиву чансса, накI ва накIлил дукра. Чичинну атеросклероз думиннансса ца- кIира рецептгу.
-ЦIуну дурсса чимусул сок­равух хIала дайссар гайкссара ницI. Гьантлун 3-4 ца-ца чяйлул къуса ва даруврал дукра дукан 15 минутIрал хьхьичI хIачIлан аьркинссар.
-1 кг сельдерейрал, 2 лимон, 100 гр лаччул, 100 гр. хрендалул мархлул ларсун – дуккан дай­ссар гьарзат дикI гьаяй машиналувух. Пюрундалул посудалуву кисайгу ялун дуртун дишайссар 12 ссятрайсса гъили­сса кIанттай. Яла 3 гьантлийсса дишайссар дюхлулсса кIанттай. Яла сок хьхьирцIуну ца-ца десертрал къуса гьантлун 3-ла, дукра дукан 15 минутIрал хьхьичI хIачIлан аьркинссар.
-Гьантлун ца ккарччи лаччул мюрш дурну ччатIущал канарча хъинссар
-Хьхьирил каландалул порошокрал дачIи чяйлул къуса уттубишин хьхьичI хIачIларча хъинссар щинащал 15-30 гьантлийсса.
-Боярышник щаращи дурсса щин хIачIларча хъинссар дукра дукан 30 минутIрал хьхьичI.
-Ссуссулийх дуккайссар ца ккирттаращалсса лимон ва ца бакI лаччул. Ялунгу дутIайссар 1 л щаращисса щинал. Ца ссуткалийгу диртун дигьайссар. ХIачIлачIияра ца-ца дукралул къуса гьатлун шамилла, дукра дуркуну махъ.
ЦIуллуну битаннав.

ХIадур бувссар
Т. ХIажиевал