Нитти-буттахъал цалчинсса мажлис

Республикалул БакIчи Рамазан АьбдуллатIиповлул гьурттушиндарайну ларгсса нюжмаркьиниИзбербашрай «Солнечный берег» тIисса оьрчIру бигьалагай центрданий хьунни респуб_ликалул нитти-буттахъал цалчинсса мажлис.
Муний гьуртту хьунни Аьрасатнал ПаччахIлугърал Думалул ва ДР-лул Халкьуннал Мажлисрал депутатътал, министерстварттал, ведомстварттал, вузирдал, дуккаврил идарарттал каялувчитал, элмулул ва жяматрал ишккаккулт.

Зулайхат Тахакьаева
Рамазан АьбдуллатIиповлул бувсунни махъсса мукьра шинал лажиндарай Дагъусттаннай бувну бушиву школалийн гьаннинсса кIулшиву дулаврил 100 идара, мунийну дузал бан бювхъуну бур 34 азара оьрчIансса кIану. Бувну бур 15 оьрчIансса 30 кIулшиву дулаврил идара. 11 школа тIитIин тIий бусса бур цIусса дуккаврил шиналгу.
«Екатерина Толстиковал каялувшиндаралу хIадур дурссар, ду­ккаврил кIулшиву ларай дансса 11 программа. Ми программарду щурущи дан аьркинссар гьарцагу школалий. Жула мурад ччясса мутталий дагъусттаннай лавайсса даражалул пишакартал хIадур баву. Мунийн бувну республикалул ца яла агьаммур проектну ккаклакиссар ялун нанисса никиран кIулшиву ва тарбия дулаву,» — увкунни республикалул БакIчинал.
Хьунабакьаврий сукку бувна школалийн гьаннинсса кIулшиву дулаврийн, мушакъатсса оьрчIан кIулшиву дулаврийн, школартту спортрал инвентарьданул дузал баврийн, Аьрасатнал кIулшиву дулаврил министерствалул дан кка­ккан дурсса дарсирдалминнуцIун дуллан ниттил мазурдилссагу олимпиадартту.
Щалагу Аьрасатнал олимпиадарттай дагъусттаннал дуклаки оьрчIал дуллалисса гьурттушиндарая буслай, Дагъусттаннал паччахIлугърал халкьуннал хозяйствалул университетрал ректор ЯхIия Бучаевлул кIицI лавгуна Екатерина Толстиковал маслихIатрайн бувну, университет­рал гьанулий сакин бан дакIний бушиву дуклаки оьрчIаву гьунарду аьч буллансса ва ми хьхьичIунмай буллансса центр.
Нитти-буттахъал кIицI лавгуна махъсса шиннардий республикалул кIулшиву дулаврил аралуву хьун дурсса дахханашиннардал хIасиллу хьхьичIунсса душиву.
КIицI лавгунни сакин бан дакIний бушиву республикалул нитти-буттахъал комитет, цивунгу буххантIий бусса бур школалул оьрмулуву чялишсса гьурттушинна дуллалисса нину-ппу.
Ахирданий республикалул БакIчинал паччахIлугърал цIарду ва наградартту дуллуна кIулшиву дулаву хьхьичIуннай давриву захIмат бивхьусса инсантуран. «Солнечный берег» центрданул каялувчи МахIаммад Асхабаьлиевлун дуллунни Дагъусттаннал кIулшиву дулаврил бусравсса зузалал цIа.