[dropcap]Г[/dropcap]ьашину хIажлийн лагаврил чIумал, къаххуйсса эпидемиялул тагьар хьуну дур дунияллий, цIусса короновирусрал инфекция ппив хьуну. Мунийн бувну нигьачIаву хIасул хьуну дур агьалинайн му азар лахъаврил ва ппив шаврил чулуха.

ХIасан Аьдилов
Му вирусрал захIматсса цIуцIаву сукку дайссар, чIявусса инсанталгу ли­тIайссар. Азарданул лишанну пневмониялул журалий­сса дикIайссар, ччаруллал ва лякьлул цIаллил куннасса диялдакъашивурттащалсса.
Му азар хIасул хьуния шинмай (2012 шинал сентябрь) сияхIрайн лавсун ур къашавай хьусса 2000 инсан дунияллул 27 билаятрай. Миннавату 703 инсан ивкIуну ур. ЧIявуми бивкIун бур Саоьдуллал Аьрабусттаннаясса.
ЦIанасса ппурттуву ВОЗ-рал (Всемирная организация здравоохранения) бивщу­сса кьиматрайну му азарданул тагьар дунияллий хIисавну дур ляличIину къаххуйсса, билаятирттая-билаятирттайн ппив хъанахъисса, амма му тагьар дахчилай дакъар ца билаятраяту цамур билаятрайн гьан-бучIан.
Августрал 14-нния шинмай байбивхьуссар Дагъус­ттаннаяту хIажлийн лаглан, 2 кьини МахIачкъалаллал аэропортраяту лерххун дур 8 самолет 1848 инсаннащал. ХIажлийн наними ххал буллай бур санитар-карантиндалул контрольданул. Ххал дуллай бур хIажлийн наниминнал вакцинарду баврил сертификатру.
Роспотребнадзорданул дакIнийн бутлай бур хIажлийн наниминнан лахъай азардая буруччинсса чаранну:
-ишла дуллан фабрикалул, заводрал дуккан дурсса шушравусса щин, ягу щаралархъсса щин;
-ххуйну шюшин ахъулсса ва ахънилсса;
-дукра канан так вихшала дусса кIанай;
-дукра канан хьхьичI кару шюшаван, ссахIван бувккун;
-гигиеналул кьяйдарду дуручлан
-хIажлия зана хьуну махъ 21 кьини зулла цIуллушиврух къулагъас дуван;
-агарда къашайшиву хIасул хьурча, гацIанава оьвчин анаварсса медициналул кумаграйн.