[dropcap]Т[/dropcap]талаткьини МахIачкъалалив хьунни аьдатравун дагьсса Дагъус­ттаннал кIулшиву дулаврил зузалтрал август зурул мажлис. Мунин хас дурну, Дусшиврул къатлул жанахIраву дирхьуну дия республикалул кIулшиву дулаву хьхьичIуннай даврия, вузирдал ккаккиярттая бусласи­сса ва «ПЕРИ инновация» бизнес-инкубаторданул проекращал кIул буллалисса стендру.

Зулайхат Тахакьаева
Мажлисрай гьуртту хьунни республикалул БакIчи Рамазан АьбдуллатIипов; ДР-лул ХIукуматрал хъунаманал хъиривчу Екатерина Толстикова, Халкьуннал Мажлисрал хъунама Хизри Шихсаэдов, кIулшиву дулаврил министр Шагьаьппас Шагьов; министерстварттал ва ведомстварттал каялувчитал, депутатътал; шагьрурдал ва районнал бакIчитал, дуккаврил идарарттал каялувчитал.
Рамазан АьбдуллатIиповлул кIицI лавгунни паччахIлугърал ва жяматрал оьрмулуву учительнал пиша ца яла агьамсса кIанттай бушиву. Бувсунни махъсса мукьра шинал дянив школарттай низам дишин бювхъушиву. Гихунмай тIурча кIулшиву дулаврил даража лавай баншиврул аьркинну бушиву за кIулсса сакиншинначитал, респуб­ликалул ХIукуматрая тIайла хьуну, муниципал сакиншиннардал зузалт­райн ва учительтурайн бияннин.
«Махъсса 4 шинал дянив Да­гъусттаннай бувссар 100-нния ливчусса школалийн гьаннинсса кIулшиву дулаврил идара. Мунийну дузал бувссар 32 азара оьрчIансса кIану. Ва хъуннасса давур, Аьра­сатнал Президентнал федерал программалийну дан бювхъу­сса. Жура аьркинссар 2018 шинал ливчIсса цинявппа оьрчIан школалийн гьаннинсса идарарттай кIанттурду дузал бан. ЧIявуми оьрчIал багъру бур инвестортурал каширдацIух бувсса. Ва ххуйсса бизнесри, жувагу ва даврицIун бюхъайкун кабакьу буллантIиссару, кунни АьбдуллатIиповлул .
Ихтилат къуртал буллай, республикалул БакIчинал барчаллагь увкунни дуклаки оьрчIайгу дакI цIуцIаву дуну, билаятрал бучIантIимунил цIаний дакI тIайлану зузисса учительтурахь.
Шагьаьппас Шагьовлул бувсунни ларгсса дуккаврил шинал хIасиллая, школалийн гьаннинсса, гьанусса ва пишакарсса кIулшиву дулаврил агьамми ккаккиярттай цайва-цайва авцIуну. Бувсунни цIусса дуккаврил шинал мурадирттаягу. Агьамми мурадруну министрнал цIакунни кIулшиву дулаврил даража лахъ баву, кIира ва шанна сменалул кьаралданий зузисса школартту ца сменалул кьаралданийн буциншиврул цIу-цIусса школартту буллай байбишинтIий бушиву.
Республикалул хъуншагьрулий кIулшиву дулаврил тагьар ци даражалий дуссарив ва гихуннай му хьхьичIуннай дуллансса мурадру цукунсса буссарив бувсунни МахIачкъала шагьрулул бакIчи Муса Мусаевлул. ДакIнийн бувтунни цаппара шиннардил хьхьичI МахIачкъалалий школарттал статус бат хьуну диркIшиву. Школарттал ва детсадирттал территориярдай чIярузивурду дусса къатри ва коммерциялул объектру дуллай бивкIшиву. Му низам дакъашиврущал талангу хъинну жапану бивкIшиву.
Ванал кIицI лавгунни ЕГЭ-рдал хIасиллу ххуй хьушиву, школарттайн гьаннинсса кIулшиву дулаврил идарарттай цIу-цIусса кIанттурду ххи хьушиву.
«ХIакьину МахIачкъалалив электрон очередьрай буссар 30 азарунниха ливчусса оьрчIру. Аьрасатнал Президентнал май зурул указирттал лагрулий жу ххал диргьу­ссар 3 шиная 7 шинайн бияннин­сса оьрчIан школалийн гьаннин­сса кIулшиву дулаврил идарарттай кIанттурду дузал бансса программа. ЦIусса идарартту тIитIаврицIун жу щурущи буллай буссару цIусса проектругу – билдинг-садру ва кулпатирттавусса садру. Кабакьу буллай буссару частнайсса детсадирттацIунгу», — ххи бунни Муса Мусаевлул.
БатIаврий ялагу ихтилатру бунни Рособрнадзорданул тестированиялул федерал центрданул каялувчи Юлия Егоровал, Татарсттаннал кIулшиву дулаврил ва элмулул министрнал хъиривчу Илдар Мухаметовлул. Вайннащал дантIий дусса дур кIулшиву дулаврил даража лахъ бансса кьутIи.
Агьамсса ва хъинну дакIний личIансса иширан ккалли бансса хьунни «Учитель года – 2017» конкурсрай ххув хьусса ва хьхьичIунсса кIанттурду бувгьусса учительтал лахъа-хъун баву. Конкурсрай ххув хьусса МахIачкъала шагьрулул 38-мур гимназиялий оьрус мазрал дарсру дихьлахьи­сса Марина ХIажиеван республикалул БакIчинал пишкаш дурунни квартира ласунсса сертификат. КIулшиву дулаву хьхьичIуннай даврил цIаний чIярусса шиннардий захIмат бивхьусса учительтуран дуллунни ПаччахIлугърал цIарду ва наградартту.
«Дагъусттан Республикалул лайкь хьусса учитель» тIисса цIа дуллунни кIулшиву дулаврил аралуву зий мукьцIалунниха лирчусса шинну хьусса, Сангардал школалий лакку мазрал дарсру дихьлахьисса Айгунова ПатIимат МахIаммадлул душнин.
Барча тIий буру ПатIиматлухь лайкьсса награда. ЧIа тIий буру тIайлабацIу.