ЦIусса миналул бухсса масъалартту

Август зурул 7-нний Дагъусттаннал правительствалуву хьунни ЦIуссалакрал райондалия агьали цIусса миналийн бизан баврил ва Аухуллал район цIу дуккан даврин хас дурсса хIукуматрал программа иширайну дузрайн дуккан даву мурадрайсса мажлис.

И. Саидова
Мажлис бачин бувну ия ДР-лул экономикалул министр, Дагъусттаннал ХIукуматрал председательнал хъиривчу Раюдин Юсупов.
Шикку гьурттушинна дунни ЦIуссалакрал райондалул ва Къумтуркъалаллал районнал хъуниминнал ва вай масъалартту хъар хъанахъисса министерствардал ва идарарттал вакилтурал.
Раюдин Юсуповлул цала ихтилатраву кIицI лавгунни вай масъаларттах республикалул каялувчинал диялсса къулагъас дуллай ушиву ва чIярусса шиннардий дуллали­сса бизан баврил масъаларттацIун дархIусса даву уттигу щаллу хьуну дакъашиву.
— ХIакьинусса кьини жунма багьлай бур бизан буллалисса 13 азарунния ливчусса инсантуран цIусса миналий ялапар хьунсса цинярда шартIру дузал дуван. Мунияту хьхьичIва-хьхьичI аьркинну бур цIусса минардай ххуллурду буван, цIуллу-сагъшиву дуруччаврил, кIулшивуртту дулаврил ва культуралул идарартту бан, хIасил, цинярдагу инфраструктурарду дузал дан. ЦIанасса чIумал цIуминалийсса цинярдагу щархъаву бувну буссар цIусса школарду, цаппара щархъаву буссар оьрчIал багъру. Ва шиналгу бувну къуртал хьунтIиссар уттигу кIива оьрчIал багъ. Мукьра шяраву дуссар администрациялул къатри дурну ва ливчIми шяраваллавугу дантIиссар, — увкунни Раюдин Юсуповлул.
Мукунма ванал бувсунни бизан буллалиминнан уттинин 3035 къатта бувшиву ва уттигу 660-нния ливчусса къатри буван багьлай бушиву.
Совещаниялий ихтилатру буллалиминнал гьаз бунни шяраваллаву инженер инфраструктура дузал дуван, аьрщарал межевание дан аьркинну бушиву.
Совещаниялий мукунма гьаз бунни махъ ппурттуву ЦIу­ссалакрал райондалийсса Чапаевкаллал, ЦIуссаругъуджиял ва Дахадаев­ккаллал шяраваллал дазуйсса аьрщарал хIакъираву хIасул хъанахъи­сса бястлийсса масъаларттугу.
Раюдин Юсуповлул Минимуществалийн тапшур бунни, анаварсса мутталий лавгун, вай шярваллал дазурду ккаккан дан.