Жангу, жагьилшивугу ххисса зуйнни хъунмур умуд

Август зурул 22-ний Дагъусттаннай «Сарикъум» бизнесрал бутIуй байбивхьунни «Каспий-2017» тIисса Дунияллул халкьуннал дянивсса жагьилтурал саммит. Саммитрай гьурттушинна дан республикалийн бувкIунни Аьрасатнал 30-хъул региондалия­сса жагьилтурал делегацияртту.

И.Саидова
БувкIминнан ккаккан дан хIадур дурну дия Дагъусттаннал яла гьунар буми усттартурал арцуя дурсса чIюлушиннарду, бархъаллал тIахIунттудувултрал кьай-кьуй. Мукунма тIивтIуну бия дагъусттаннал миллатир­ттал дукрардал буллугъсса ссупрарду.
Саммитрал даву тIиртIунни МахIачкъалалив Къумукьнал театрдануву.
Шикку гьурттушинна дан бувкIсса хъамал барча буллали­сса ва даву дайдихьлахьисса ихтилат бунни ДР-лул ХIукуматрал председательнал цалчинма хъиривчу Анатолий Карибовлул.
— Республикалий дуллали­сса хъуннасса агьамшиву ду­сса саммитрал исват буллай бур жагьилтал дунияллул халкьуннал дянивсса иширттавух гьурттушинна дан чялишну бушиву. Саммитрал агьанмур мурадгу хIала-гьурттушиврийсса арарду хьхьичIуннай давур. ЧIяву миллатру ялапар хъанахъи­сса региондалул даврил агьанмур бутIану хъанахъиссар жагьилтурал дянивсса жяматий­сса дахIавуртту даву, жагьилтурал масъалартту щаллу баву ва паччахIлугърал жагьилтурал политика дачин даву, — увкунни Анатолий Карибовлул.
Мукунма Карибовлул цала ихтилатраву чIурчIав дунни форумрай хъуннасса аякьалийн лавсун бушиву экология ядаврил ва дуруччаврил масъаларттугу.
Форумрал гьурттучитал барча бунни Республикалул Жагьилтурал иширттал министр Арсен ХIажиевлул.
Экологиялул партнер «Центр природы Кавказа» АНО-лул чулуха жагьилтал барча бунни директорнал хъиривчу Сааьду Казиевлул.
ХIурмат бусса хъамаллуравух бия Ингушнал жагьилтурал комитетрал каялувчи Сулайман Эгиев, Ухссавнил АьсатIин-Аланиянал Жагьилтурал комитетрал каялувчи Борис Цаликов, ДР-лул Экологиялул ва тIабиаьтрал сурсатирттал министр Набиюлла Къарачаев, ДГУ-лул ректор Муртазааьли Рабаданов ва ДР-лул Халкьуннал Мажлисрал депутатътал.
Шиккува кIицI лаган «Кас­пий-2017» Дунияллул халкьуннал дянивсса жагьилтурал саммит кIулшиву ларай даврил ва социал лагрулул проектри, цурдагу цайми региондалул жагьилтуращал хIала-гьурттуну зий, хьхьичIунмай хъанансса.