Гъирарай хьунабакьару жу цумур-бухьурчангу мурадрай редакциялийн увкIсса хъамаличунащал. Ва ххуллух жучIан увкIунни Амурдал областьрайсса Екатеринославка тIисса шяраву контракт­рай аьрали къуллугъ буллалисса Хъусращиял шяравасса Мяммал арс Исмяил Тахакьаев.

И. Саидова
Аьралуннаву къуллугъ бувну къуртал хьуну махъ Исмяиллун пикри хьуну бур контрактгу чирчуну, тиккува ацIансса. Гьай-гьай, захIматри, аьрали къуллугъ къуртал шайхту, цIуницIакулгу аьрали кьануннайсса оьрму бутлай тиккува ацIан. Шавай зана хьуну махъ даврил щаллу хьунссара тIисса умудрайн вих акъасса жагьил, цуксса цанма захIматнугу, аьралуннаву къуллугъ буллан ивкIун ур.
Исмяил буслай ур цащалва архIал къуллугъ буллай бивкIсса 100-нния ливчусса Дагъусттаннаясса оьрчIалгу контрактру чирчуну, тиккува бавцIушиву.
— Контрактрайсса къуллугъ буллалаву жаваблувшиву ххишаласса дусса бур. Жу къуллугъ буллалисса частьраву аьралиталгу жущал хъинну хIал бавкьуну, хIурмат-кьиматрай бикIай. Шинай цал, ххуллун харжгу бивхьуну, отпускалийн тIайла буккару, командировкарттайн гьан бару, аьрали чинну дулай, лавайсса даражалул медициналул кумаграл дузал бару, санаториярттайн тIайла буккару. Кулпат бусса ухьурчан, ялапар хьунсса къатрал дузал бай. КIилчинмур контракт чирчу­сса чIумал, къатта-къуш ласун­сса ипотека дулай. 12 шинай контрактрай аьралуннаву къуллугъ буварчан, ипотекалий лавсъсса къатта-къуш жунма личIлай бур. Техникалуха зий, дарсирдайн занай мюнпатну чIун лагай. Нюжмардий кIира кьини дуссар бигьалаган ккаккан дур­сса. Мукунма жучIа таман­сса хIаписартал бур Дагъусттаннаясса, тайнналгу хъуннасса аякьа дикIай жуха.
Аьралий низамрай аьдат хьусса на, игьалаган увкIсса чIумалгума зукъазий ацIан ччай акъара. Ттущал архIал къуллугъ буллай ивкIсса дус, кIира-шанна шинай даву лякъин хъанай акъа­ра, тийхва къаацIаврия пашман хьунна тIий ур.
Инсан цува цукунсса урив, мукунсса дикIай мунахсса ургавугу. Жула жагьилтал цахъи ссавур дан хIаллихсса, анавар буккайсса бикIай. На мудангу икIара миннахь зуйнна вихшала дишиншиврул бакIрайва хIарачат бара зува лайкьсса чулуха ккаккан буван тIий.
Давурттив дакъа ливчIсса жагьилтурахьгу ура на кумаг банна тIий, ттучIанма кIункIу буллай. Ва ххуллухгу, Аллагьнал кабавкьуну, ттула чIивима уссу увцуну най ура.