«Чистое сердце» ихIсандалул фондрал сипталийну ттигъанну МахIачкъалалив Республикалул кардиологиялул центрданий хьунни медициналул акция. Москавлия А. Н. Бакулевлул цIанийсса къюкIлил ва туннурдал хирургиялул элмийсса центрдания бувкIсса пишакартурал кIива гьантлул дянив уква кьамул бунни щала республикалия бувкIсса 300-ннийн бивсса къашайшалт.

Зулайхат Тахакьаева
Пишакартурал бусласимунийн бувну, хIакьинусса кьини так ца Аьрасатнаву бакъасса, цайми билаятирттайгу чIявуми инсантал литIлай бусса бур къюкIлил ва туннурдал цIуцIавуртту сававну. Мукунсса иширттая буруччаву мурадрай, пишакартал маслихIат буллай бур къашайшалтран цила чIумал къюкIлил хIакинтурайн буккаван.
Ва цIуцIаву цурдагу гьантта бувккуну жагьил хъанай най дусса дур. 2016 шиналсса сияхIрайн бувну, Бакулевлул цIанийсса центрданий хъин хьун Дагъусттанная лавгун усса ур 525 инсан, миннава 304 – оьрмулул бугьарасса. Республикалиясса чIявусса агьали лавай­сса даражалул пишакартурачIан консультация дан билаятрал хъуншагьрулийн хъунисса харж-хуржгу буккан бувну лаглай бушиву хIисавравун лавсун, «Чистое сердце» фондрал попечительский советрал хъунама, КПРФ-лул чулухасса Аьрасатнал ПаччахIлугърал Думалул депутат Ризван Кьурбановлул ва «Единая Россия» партиялул чулухасса депутат МахIаммад ХIажиевлул тавакъюрайсса оьвчаву дурну дур Бакулевлул цIанийсса центрданул директор Лео Бокерияйн, Да­гъусттаннайн хасъсса пишакартал тIайла букки тIисса.
Акциялул ца агьаммур мурад бур Москавлив къюкIлил ва туннурдал пишакартурачIан гьан-бучIан каши дакъа­сса агьали кьамул баву. Ва ак­ция бикIантIишиву Ризван Кьурбановлул баян бувну бия соцсетирдаву сайки зурул хьхьичIва. ЧIирисса чIумул му­тталий къюкIлил ва туннурдал пишакартурачIан консультация дан чивчуну ия 300 инсан.
Цумацагу къашайшалан пишакартурал бунни хасъсса маслихIатру. Медициналул анаварсса кумаг аьркинсса къашайшалт лавсун бур Бакулевлул цIанийсса центрданий уква хъин бан багьлагьиминнал сияхIрайн.