Гьуйятусса Апаннинал ва Мааьзатлул арс МахIаммадал АбутIалиблул ва ПатIиматлул душ Муъминатлул цачIу оьрму бутлай августрал 20-нний там хъанай дур 50 шин.
ХхюцIалла шинал мутталий цала оьрмулувусса циняв ххаришивурттугу, захIматшивурттугу архIал лахълай, цаннал хIурмат цаннал буллай, цаннал ка цаннал дургьуну нанисса кулпат бур АьвдулхIамидовхъал кулпат. Шяравуминналгу, кIулминналгу ххуйшиврийсса эбрат ласайсса кулпат бур.
Муъминатлул 1975 шинал къуртал бувну бур Дагъусттаннал медициналул институт, ккарччал хIакиннал касмулий. 1975 шинал бувххун бур зун Республикалул стоматологиялул поликлиникалийн стоматолог-терапевтну. ХIакьинусса кьинигу Муъминат зий бур ва поликлиникалий лавайсса категориялул хIакинну. ХIурматрайгу бур архIал зузиминналгу, къашайшалтралгу дянив. Ванил хIалал дурну дур чIярусса хIурматрал грамотартту ва бахшишру.
МахIаммадал къуртал бувну бур 1958 шинал Буйнакскаллал финансирттал техникум. Дуккаву къуртал дурну махъ 55 шинал мутталий зий ивкIун ур Лакрал райондалул финотделданий Финансирттал министерствалий, ЦIуллу-сагъшиву дуруччаврил министерствалий, Центральный больницалий, Республикалул медициналул страхованиялул фондрай хъунама ревизорну, лавайма бухгалтерну.
МахIаммадал давривусса ккаккиярттал кьимат бивщуну бур ларайсса наградарттайну: «СССР-данул финансирттал даврил отличник», «ДР-лул лайкь хьусса экономист», «ЦIуллу-сагъшиву дуруччаврил отличник», «ЗахIматрал ветеран» ва чIярусса цаймигу.
МахIаммада хъунмасса хIурматрай ур, Лакрал райондалий акъассагу, Дагъусттаннал чIярусса районнайгу, му хъинну ххирар архIал зий бивкIминнан, ванал цIа кьадрулий дакъа зумух къаласай.
Муъминатлул ва МахIаммадал, хъунигу бувну, чивун буккан бувну бур ххаллилсса кIия арс ва ца душ. Арсру, Апанни ва АбутIалиб бур канил гьунар бусса стоматологтал. Душ, ХIалимат, УЗИ аппаратрал лаваймур категориялул хIакин бур. ДакIнийхтуну барча дуллай буру МахIаммадал ва Муъминатлул оьрмулуву кIицI лаглагисса хъуннасса кьини! ЧIа тIий буру вайннан цIуллушиву ва цIу-цIусса ххуй-хъиншивуртту! Зу жун тачIаввагу чан къабаннав!
Душ, арсру, уссу-ссурвал ва цинявппагу зу ххирами
