Архссаксса – ччаву ххину

ХIакьину дагъусттанлувтал ялапар хъанай бур дунияллул гьарцагу мурцIний. Гъурбатрайсса жула инсантурал, цала мархрая, мазрая ва аьдатирттая ябувцун къаличIаншиврул сакин дурну дур миллатирттал диаспорарду, магьирлугърал центрду, ккуранну.
ХIасул хьуну дур Дагъусттанлувтурал диаспорарду Къаза­хъисттаннал Республикалул сайки гьарцагу областьрай.
Ца яла хъуннасса диаспора дур Мангистауллал областьрай. Муний 2001-кусса шиная шинай каялувшиву дуллай ур Гъумучатусса АьвдурахIманнул арс Юсуп Шахшаев.
2009 шиная шинай тIурча, каялувшиву дуллай ур «Халкьуннал маслихIат» тIисса Къазахъисттаннал жяматийсса ккурандалийгу. Ва ур «Нур-Отан» партиялул член, Къазахъисттаннал халкьуннал ассамблеялул член. Лайкь хьуну ур Къазахъисттаннал ХIукуматрал чулухасса личIисса-личIисса медаллан ва лишаннан. Вай гьантрайгу Юсуплун дуллуну дур Аьрасатнащалсса дусшиврул арарду цIакь давриву ва аьрасатнал магьирлугъ дуруччаврил цIаний бивхьусса захIматрахлу дазул кьатIувсса ватанлувтурал иширтталсса буллалисса Аьрасатнал ХIукуматрал коми­ссиялул чулухасса ХIурматрал грамота.
Ванал чялишсса гьурттушиндарай зузи дурну дур Мангистаулий Дагъусттаннал РГВК канал, цIу дуккан дурну дур Актаулия МахIачкъалалийнсса ва Актаулия Грозналийн­сса авиарейсру. Чулийн буккавай бусса бур уссурвалсса республикарттал дусшиврул ххуллу – паромрал ххуллу «Актау – МахIачкъала». «Къазахъис­ттаннан ва Аьрасатнан лябукку буну лякъинтIиссар ва ххуллу.

Къазахънал халкьуннал ца яла бусравминнавух лаккучугу уссар

— Юсуп, та бизлай байбивхьуну бур дагъусттанлувтал Къазахъисттаннайн?
— Шиккун цалчинсса дагъусттанлувтал бивзун бусса бур 1877 шинал, цивгу паччахIнайн къаршисса бунтравух гьуртту хьусса инсантал, яни ссивир бувсса инсантал.

 

Юсуп Шахшаев Чачан-Ингушнал этнокультуралул ккурандалул каялувчи Умар Лорсановлущал,
Дусшиврул къатлул зузалтращал ва «Шадвал» ансамбльданул къавтIалтращал

Хъунмасса Буттал КIанттул цIанийсса дяъвилул шиннардий Дагъусттанная Къазахъисттаннайн бизан бувну бур Кировлул цIанийсса аьрали завод — 11 азара пишакар ва зузала. Цимиягу азара инсан гьуртту хьуну ур целина кIикIавриву. Дяъвилул махъсса шиннардий букIлай байбивхьуну бур комсомолданул стройкардай зунсса жагьилсса пишакартал. Дунияллийх цIа ларгсса дагъусттаннал сянаткартал: заргалтал, ссяткартал, тIахIунтту дувулт Тупкараганнал аьрщарайн бизлай байбивхьуну бур ХХ-мур ттуршукулул 50-ку шиннардий.
Тупкараганнал агьлу хIакьинусса кьининин барчаллагьрай буссар Кировлул цIанийсса къазахънал школалий оьрус мазрал дарсру дихьлай ивкIсса Нураттин Садикьовлуйн, Форт-Щевченко шагьрулул ветеринар станциялул каялувчи Рустам Щамххаловлуйн.
1959 шинал Къюллул ЦIув­кIуллал шярава увкIун ур Нуруллагь Садикьов. Дуклай ивкIун ур Горькийл цIанийсса Баутинский школалий, лавхьхьуну бур къазахъ маз. Мангистауллал авлахърал хасшивурттайн вардиш хьуну, Ломоносовлул цIанийсса МГУ къуртал бувну махъ зана хьуну ур Мангишлак­райн. Технический элмурдал доктор хьуну, Ш. Есеновлул цIанийсса Каспийскаллал паччахIлугърал технологиялул ва инжиниринграл университетрал проректорну зий, хъунмасса захIмат бивхьуссар вуз хьхьичIунмай бавриву.
Дагъусттаннал диаспора лапва гьарта-гьарза хьуну бур Мангишлакрай, навтлил, газрал, урандалул мяъданну буклай байбивхьу­сса ппурттуву.
ЦIанасса чIумал Мангистауллал областьрай ялапар хъанай бур 4500-ннийн бивсса дагъусттанлувтал, миннава мукьазара ур лазгиричу. ЛивчIсса ххюттуршуннавагу 90 — лаккучу, 80 — яручу, 140 – ну­гъай, къумукь, ва вайми миллатру чансса бур

Зий буссар алхIаткьинисса школа

— Та сакин дурссар Мангистаулий Дагъусттаннал этнокультуралул ккуран?
— 1997 шинал декабрь зурул 5-нний сакин дурссар Дагъус­ттаннал халкьуннал Мангистауллал областьрайсса этнокультуралул ккуран «Дагъусттан». Гьашину 20 шин бартлаглаги­ссар. Мунил цалчинсса хъунама хьуссар Агъуллал райондалиясса Оьмар Оьмаров, Къаза­хъисттаннал ПТИ къуртал бувну, Актау шагьрулул личIи-личIисса идарарттай каялувшиву дуллай ивкIсса.
Дагъусттаннал этнокультуралул центр Къазахъисттаннай буссар мяйва: кIива — Актаулий, ца — лазгиял цалалусса, ца — Дагъусттаннал аьмсса; Атырауллай (каялувчи Муса Аьлишаев), Алма-Аталий (каялувчи Ххажижат Увайсова), Астаналий (каялувчи Шагьимардан Аьлибулаев), — вай шамагу лаккучури; Карагандалий (каялувчи Рамиз Ширинов); Уралскалий (каялувчи Даази Оьмаров).
Актаулийсса этнокультуралул центрданучIа дуссар къав­тIаврил ансамбль Шадвал. Да­гъусттаннал оьрчIру бакъа­сса муниву къавтIий буссар оьрус, къазахъ, хIатта корейнал миллатрал оьрчIругума. Миннал цала-цала ккуранннал ансамльлу дунува, дагъусттаннал, ккавкказнал зумуну къавтIун ччай буру, тIий бувкIсса.
2003 шиная шинмай зий бу­ссар АлхIаткьинилул школа. Лазги чIявусса ялапар хъанай бухьувкун, миннал группа бигьану бавтIуна. Жула лакрал жагьилсса нитти-буттахъан цанма ччай оьрчIан лакку маз лахьхьин буллан, учительгу лявкъуну, декабрь зуруй дихьлай байбивхьуссар лакку мазрал дарсру. Дарс дихьлай бур Ккуллал шяраватусса Читаева Сапура, ва цуппа зий буссар Актау шагьрулул 1-мур школалий, байбихьулул классирттахь дарс дихьлай.

— Щил дулайссар му школа ябансса харжлугъ?
— Мангистауллал областьрал хIукуматрал виваллил политикалул управлениялийхчин Гражданшиврул альянсрал дурххунни мазру хьхьичIунмай баврил ялув зунсса тендер.
Мукуннасса тендер дур­ххуну, тIивтIуссар «Халкьуннал аслахIшиву» ккурандалучIа Дусшиврул къатта.
Жун ккаккан бувна кIива къатта. Жула ккурандалул вакилтурал каширдацIух ремонт дурну, цанниву тIивтIуссия стенд — «Ттул Дагъусттан» ва ОьрчIал ассамблея, гамур къатлуву тIивтIуссия АлхIаткьинилул школа. Учительница зий бур цила энтузиазмалий. Ча-дунугу арцу хьусса чIумал, арцуйнусса бахшишру дувару, хIукуматрал чулуха дипломру булару. Аьра­сатнал вакилханалийхчин ЦIу­сса шинал бахшишру дай­ссар оьрчIан ва учительтуран.
Дусшиврул къатлуйхчил арцу ляркъуну, дурурххуссар къавтIалтрансса костюмру 1,5 миллиондалунсса.

— Дагъусттаннал диаспорарду дусса гьарцагу шагьрурдай салкьи хьуну дур хасъсса аьдатру, аьдатравун дагьну дур личIи-личIисса мероприятиярду. Чансса дакъахьунссар ми зучIагу.
— ЧIяруссар ккурандалул дуллалисса мероприятиртту. Махъсса шиннардий дуварду Расул ХIамзатов ниттил увну 90 шин там шаврил юбилей. Ураллая увкIуна Къазахъисттаннай­сса Аьрасатнал консул, жула да­гъусттанчу СяидмахIаммад Забитов. Ва Дагъусттаннал этноцентрданул чIаравгу ацIай.
Хъиривмур шинал ДР-лул ХIукуматрачIасса Аьрасатнал халкьуннал аслийсса культуралул центрданул гьурттушиндарайну дуван дакIний буру Хъамаличунал кьини (День кунака). Махъзуманив Дагъусттаннай ва хъинсса аьдат цIудуккан дуллай байбивхьуну бур.
Гьашину цалчин дарду Интнил хьхьу. ЧIумуя-чIумуйн дувару ахIвал кIюласса кулпатир­ттансса ихIсандалул ххуллийсса акцияртту. Каши дусса инсан цуя ца чулий къаацIай.
— Гьарца шинал декабрь зуруй дайссар Къазахъисттаннал лайкь хьусса тренер, кIулшиву дулаврил отличник, щалагу союзрал категориялул судья, Мангишлакрал областьрай лачIунбуккаврил спорт хьхьичIуннай даврил гьану бивзсса МахIаммад Расуловлул (яручу) савлугърансса ТIиртIусса рес­публикалул лачIунбуккаврил турнир, ва цува увсса кьинилун хасну. МахIаммад Расулов, Мангишлакрал областьрал спорткомитетрал оьвкуну, 1979 шинал Актаулийн увкIун, ОьрчIал ва чIаважагьилтурал спортшкола тIивтIуну, ганил директорну зий уссия. Тамансса шиннардий ­уссия областьрал хъунама тренерну, областьрал спортшколалул директорну.

— Дагъусттанлувтурал дянив бурив спортрахун машхул хьусса, му аралуву хьхьичIунмай хьу­сса цаймигу?
— ЛачIунбуккаврил, дзюдолул ва цаймигу спортрал журардай Дагъусттаннаясса 11 инсан хьуну ур Къазахъисттаннал ССР-данул чемпион, дунияллул чемпионатирттал ва олимпий тIуркIурдал призертал.
Халидов Халид каратэ-до-лул — Азиянал ва Европанал чемпион. Мангистауллал областьрал ДВД-лул полициялул лейтенант, Марид Муталимов (къумукь) — Дунияллул халкьуннал дянивсса классрал спортрал мастер.
Рустам Адамов (ссурхIиричу) — каратэлул спортрал мастер.
Ккулатусса Шамил Читаев — гьузузаврил мастер спорта,
Афганнал дяъвилул гьур­ттучи Рамазан АьбдурахIманов (яручу) пожарно-прикладной спортрал 1-мур разряд дусса, пут гьаз даврил ва пут личаврил усттар.
Жагьилсса Милена Аьбдуллаевал тIурча жу ххари буллай буру художествалул гимнастикалуву хьун дуллалисса хьхьичIуннайшивурттал. Центрдал дянивсса бяс-ччаллай мудан хьхьичIун дуккайссар футболданул ветерантурал команда «Дагестан».

ЧIивинийра ккарккуна Къазахънал авлахърайн агьансса макI

— Буси виятува, цукун бакIрайн агьра Актаулийн?
— Увссара Гъумук. Ппу ия радио-телевизорду бакьин байсса усттар, дяъвилул гьурттучи. Ччяни дунияллия лавгуна. Ниттил цилалу ччаннай бацIан бувссару шанма оьрчI. Уссу, Шахша, зий ур Избербашрай спортклубрал директорну. Ссу МахIачкъалалив ялапар хъанай бур. Гъумучиял школа къуртал бувну, дуклан увхссара Орджоникидзелийсса зунттал шяраваллил хозяйствалул институтравун. Зий уссияв цал Манасрай, яла Избербашрай инженерну.
1977 шинал, кулпат байхту, бигьалаган бувкIссияв Актауллайн. ЦIуну буллалисса жагьилтурал шагьру ххуй бивзун, ца ххюра шин данна, квартирагу, машинагу ласунсса арцугу салкьи дурну зана хьунна тIисса пикрилий уссияв. Зий уссияв «КазТрансОйл» АО-лул СТ-лий личIи-личIисса давурттай, яла — хъунама инженерну. ЦIанакул зий ура «Элем-Т» ТОО-лул директорну.
Кьадарданул увцунна на шихун. ТачIав дакIния къадуккай оьрчIний ттунна ккарксса макI. Дяъвилул махъсса шиннардий бувсса жун мудан баллайнма бикIайва дяъвилиясса гъалгъарду. Жу оьрчIругу дяъвилул тIуркIурдай бикIайссияв. Изберграй ялапар хъанахъисса ппур­ттуву ца хьхьуну макIра хьунни немец бувкIун, нава чуннив къакIулну увцуну лавгун, щала оьрму гъурбатрай лавгсса. На хъунаману зузисса предприятиялул заллу немец миллат_рал инсан ур — Виктор Михайлович Кох. ТтучIава мастерну зий ивкIсса ттула хьхьичIавасса ученикри цувагу. Шагьрулул мэрну зий ивкIсса, хьхьичIунсса ишбажаранчи.
Ттул кулпат Занни филологри. АцIра шинал хьхьичI хIасул дунни турфирма «Сахаят травел», Каспихьхьирил зуманицIухсса билаятирттайнсса турду сакин дуллали­сса. Ттул кIивагу душ ялапар хъанай бур Москавлив.

— Асар шайрив инава гъурбатрай ушиву?
— Къашай. Нюжмардий чув-дунугу лахъи лагарча, дакI махъуннай кIункIу тIун дикIай.
Билаятрал Президент Нурсултан Назарбаевлул дачин дурсса аькьилсса политикалийну Къаза­хъисттаннай дусшиврий ва дакьаврий ялапар хъанай буссар 130 миллатрал ва 46 конфессиялул агьлу.
Гьарца кIанттурдай чивчу­ну буссар вай махъру: «Жула паччахIлугърай ялапар хъанахъи­сса халкьуннал цашиву, аслахIшиву, дакьаву ва дусшиву, кувннал кувн­найнсса вихшала – вайри миллат­рал багьа бакъасса хъус.» (Нурсултан Назарбаев).
Союз ппив хъанай дайдихьлахьисса шиннардий, миллатирттал аьдатру ядаву мурадрай, паччахIлугърал кабакьаврийну байбивхьуссар сакин дуллай этнокультуралул ккуранну. Цалчин му сакин дурссар армяннал 1989 шинал. Ми центрду цачIун баншиврул сакин дурссар Къазахъисттаннал жяматийсса ккуран, «Халкьуннал аслахIшиву» тIисса. Мунил цалчинсса каялувчи хьуну ур Жаздырхан Сайдалиев. ХIакьину му ккурандалувун бухлай бур 21 этнокультуралул центр.
Мангистауллал областьрай «Халкьуннал аслахIшиву» тIисса ккуран тIитIаву хъин чулий ккавксса билаятрал бакIчинал маслихIатрайн бувну тIивтIуссар Къазахъисттаннал Халкьуннал ассамблея. ЦIанасса чIумал му Ассамлея ккаллину буссар Къазахъис­ттаннал миллатирттал дянивсса аслахIшиврул гьанусса институтран. Мунивун духлахиссар 820 этнокультуралул ккуран, миннува 28 — республикарттал. Астаналий бувну буссар Дакьаврил ва аслахIшиврул къатта. Республикалий хIасул дурну дуссар гьарцагу этнос, миннал мазру ва магьирлугъ хьхьичIуннай дан аьркинсса шартIру.
Къаза­хъисттаннай зий буссар 3784 школа къазахъ мазрай дарс дихьлахьисса, 1672 школа – оьрус мазрай дарс дихьлахьи­сса, 65 школа — узбакI мазрай дарс дихьлахьисса, 2 школа – таджик мазрай дарс дихьлахьисса, 14 школа – уйгур мазрай дарс дихьлахьи­сса. Буссар 100 миллатрал школа ва 170 алхIаткьини зузисса школа, 23 маз лахьлахьисса. Буклай буссар 15 миллатрал кказит, зий буссар 6 миллатрал театр.ТIивтIуну буссар 195 хасъсса лингвистикалул центр, оьрчIан ва бугьараминнан мазру лахьхьин буллалисса. Гьарца шинал итабакьайссар республикалий ялапар хъанахъисса цумур-бунугу миллатрал мазрайсса луттирду.
Царагу хьхьичIарасса союзрал республикалий дакъассар укунсса шартIру. Асар шайссарив шикку гъурбатшиву?
Нюжмардий цал Актаулия Ма­хIачкъалаливсса рейс тIиртIуну махъ Дагъусттаннайн шинай кIийла-шамийла учIангу бюхълай бур.

— Хъунмасса барчаллагь, Юсуп АьвдурахIманович, ихтилатрахлугу, Дагъус­ттаннал кьатIув ялапар хъанахъисса ватанлувтуран миллатрал аьдатру ва багьу-бизу хъамакъабитан дуллалисса давурттахлугу.
Ихтилат бувссар
Зулайхат Тахакьаевал