Июльданул 13-нний 95 шин там хьунтIиссия СССР-данул радиопромышленностьрал министр, Социалист ЗахIматрал Виричу, Лениннул ва ПаччахIлугъирттал премиярттал лауреат, паччахIлугърал чIярусса наградарттал кавалер, генерал-полковник,Буттал КIанттул цIанийсса Хъунмасса дяъвилул гьур­ттучи Петр Степанович Плешаковлун.

Бадрижамал Аьлиева
Ванал цIа цIакьну дархIуну дур ДагъусттаннацIунгу. Петр Степанович ивкIссар СССР-данул Верховный Советрал Дагъусттан Республикалул Бущихъиял райондалиясса депутатну. Цимилгу хьуну ур Да­гъусттаннай ва цикссагу гуж бивхьуну бур мунал республикалул промышленность хьхьичIуннай дуван. Мунал каялувшиндаралу Бущихъав бувну бур азарунния ливчусса инсантал зунсса завод.
1974 шиная 1987 шинайн ияннин, шанна оьвчаврил мутталий, Дагъусттаннал АССР-данул чулуха Верховный Советрал Миллатирттал Советрал депутатну увчIуну ивкIссар. Ца-кIира шинал дянив республикалий сакин бувссар ларайсса технологиялул цIусса отрасль – радиоэлектрон промышленность, бувссар дянивсса ва хъунисса предприятияртту: Избербашуллал радиозавод, МахIачкъалаллал радиозавод, «Эльтав» завод, «Азимут» ва мукунна цаймигу давуртту.
Плешаковлул бивхьу­сса захIматран кьимат бищун захI­матри: аьрали тагьарданий­сса радиотехникалул разведка тIий, континентирттал дянивсса душманнан къачIалачIисса ракетартту сакин даву тIий, Аьрщарал цалчинсса искусственный спутник итадакьавривух гьуртту шаву тIий, ванал дурсса хъуни­сса давурттал сияхI лахъир.
Амма цинярдагу давурттал дянив бикIайкунсса сенсацияну хьуну бур машгьурсса «ядерный кнопка». «Бявкъу дяъвилул» шиннардий радиопром хъанай бивкIссар Совет паччахIлугърал ца яла агьаммур идарану. Муний 13 шинал лахъишиврий каялувшиву дуллайгу ивкIун ур Петр Плешаков, цува аьпалухьхьун гьаннинцIакул.
Увну ур Петр Тамбовуллал областьрай хъудугьул кулпатраву. Къуртал бувну Москавуллал дахIаврил инженертурал институтгу, бивтун бур, Централ элмийсса-хъиривлаявурттал институтрал директорнал къуллугърая байбивхьуну, министр­нал къуллугърайн бияннинсса ххуллу. Зий ивкIун ур министр­нал хъиривчунал, яла цалчинма хъиривчунал къуллугъир­ттай. Му ппурттувугу щаллу дурну дур цикссагу давуртту. Петр Степановичлул каялувшиндаралу НИИ хьуну бур космосрал разведкалул спутникру баврил флагманну, цалгу Дунияллул океандалул лахъишиврий чил билаятирттал щинал лултту заназисса лодкартту ашкара дуллай диркIсса.
Петр Плешаковлул цIа дирзун дуссар Москавливсса, Челябинскалийсса, Дагъусттаннайсса ва цалла ватандалий Тамбовуллал областьрайсса кIичIирттан, дуккаврил идарарттан, предприятиярттан.