Августрал 15-нний Дагъусттаннал БакIчи Рамазан АьбдуллатIипов хьунаавкьунни АьФ-лул Президентнал Виваллил политикалул управлениялул хъунама советник Роман Балашовлущал ва Гуманитар проектирдал федерал директор Иван Есиннущал.
Хьунабакьаврий ххал бивгьунни республикалий «Аьрасат – ттул тарихри» тIисса парк сакин баврин хасъсса масъалартту. «Жу жуйнма ласарду тарихрал парк дузал баврил жаваблувшиву. Жул пикрилий, жу тIайласса даву дуллалиссару. Цинярда давурттал ялув ацIаву дуллай ур Дагъусттаннал ХIукуматрал Председатель. Паркирал даву жу дайдишинну октябрьданул 1-нний», — увкунни Рамазан АьбдуллатIиповлул.
Федерал структурарттал вакилтурал бусаврийн бувну, Аьрасатнаву яла хъунмур музей (ванийн музейгу тIий бур) бикIантIиссар Дагъусттаннай.
Масъала ххал бигьаврий гьуртту хьунни мукунма ДР-лул ХIукуматрал Председатель Аьбдуссамад ХIамидов, 1-ма вице-премьер Анатолий Карибов, зампред ХIасан Идрисов ва цаймигу.
ХIадур бувссар ХI. Аьдиловлул