«Тухум ва Ватан» тIисса луттирава
Къуллугърал ва кашилул ххишала хьун къабайссар ас, амма къуллугърал ва кашилул заллу хьуну мукьахгу ас ябан шайссар.
Агарда философ акъахьурча, пикри бивчIайссар хъунмавхьу душну.
Пикри цила мурадирайн биян бюхъайссар азарда шин ларгун махъгу.
Дусшиву ва вихшиву хъинну гъанссар искусствалучIан.
Аькьлугу, сисавугу цалийн дуцин бюхъайссар анжагъ азаруннава цаннаща.
Гьарца зат хьурдай тIий, цичIаврагу дакъа маличIара.
Инсаннал инсаншиврул кьарал чIалачIи дайсса ас-намусралли.
Къуллугърайн къачагъ лахъаву – му властьрансса кьюкьалар, къачагъшиву властьрайн дияву – му властьрал ахир пуч хьусса чIунни.
Адамгу, ХIавагу ляхъан бувну бур Заннал, ччавугу, гьавасгу тIурча, ляхъан бувну бур миннал цалва.
Закондалулгу, ас-намусралгу ташулий сакин шайссар лайкьсса ва барачатсса дуниял.
ТамахIирттаясса хайрнияр бунагьру чIявуссар.
Ссигъа бусса жувувар, мунил кIула тIурча, дуссар цайминнахь.
Дунияллий жущара жуйнна мютIи дан къашайсса ца яла захIматмур зат – му мазри.
Даврия нигьа усайсса инсан инжит айссар танмалшиврул ва бизаршиврул.
Яла хIакьмур ччаву – му ниттилмур ччавур.
Ччавриву хиянатшиву дакъассар. Дуссар так му духларгун лякъаву.
Цивппа ляхъан бувманаха лащан ца яла хъунмур хIарачат буллалими – ми художникталли.
БивкIулул яла захIматмур зат – му вила гъансса инсантал дунияллий кьаридну, бурукъавччуну кьабитавур.
Ххуйшивугу, хъиншивугу нажагь дакъа хьунакъадакьай. Агарда хьунадаркьуну духьурча – му ччавур.
Чурх бакъасса рухI – му бачIвасса хиялли, рухI дакъасса чурх – му диркIусса кьаркьалар.
Цуксса чIивисса бурив яхI, муксса хъуннасса дикIайссар лякьа.
Ина анжагъ ца чIаркIу дакъа дурну духьурчагума – мугу щин-бунугусса алжанни.
Хъунмасса къуллугъ ласи ижаралий (прокатрай), агарда инава му къуллугърал лагъну личIан къаччарча.
Ина улувкьуну бугьлагьисса дарсирдал гьаннарай ци ххяххантIиссарив щинчIав къакIулссар.
Магьри ляхъан бувссавагу хияллу хIасул хъананшиврулли.
Хъиншиврийн иман дирхьуну яхъанахъу, амма хIадурнугу икIу оьшиву хьунадакьин ва лахъан.
Цуксса чIявуну бачIлай урав ина хъинбалартту, мукссава гьарзану ми занагу хъанан бикIайссар вичIанма.
Инсантурал дунияллий цинияргу гужну щавари хьуну бур яхIгу, хIакъикьатгу.
Цува инсаннал кунна, миллатралгу дуссар цилла лажингу, дакIгу, яхIгу, къириятгу.
Вила миллатрахсса ччаврил гьанулий чара бакъа бикIан аьркинссар цайми миллатирттал чулийнмайсса хъунмасса хIурмат.
ХъатIри чIяву хъанан бикIайссар, барзулт биял къахъанахъисса чIумал.
Идеялул сакин дан бюхъайссар паччахIлугъ.
Инсаннаву яла чIявуну загьир шайсса зат – му ццахри.
Гьавасланшиврул дунияллий лякъин къашайссар дазурду.
Аваданшивугу, чиннугу оьттуйну хьун дуллалима оьттувун оьвкьун лякъайссар.
Мазрал виричу къалякъайссар чIявуну иширтталгу виричуну.
Бахтти ва захIмат – ми кIивагу ччаннайри бавцIуну бусса тIайлабацIуртту.
Зат байгьин-бугьан хьуншиврул аькьлулухь бикIан аьркинссар хъунмасса кьуват.
ХъунмурчIин «виртталну» чIалан бикIайссар цахава цивппа къуллугъ буллалими, халкьуннаха къуллугъ буллалими тIурча – чIявуну «авлиятуран» ккалли байссар.
Байбихьулийра дуссар жулла ахиргу, амма къашайссар жущава кIура баен байбихьулийн.
Лавхьхьурив гъалгъа тIун – туну, ина инсанна, лавхьхьурив кьаикIан – туну, ина аькьилла.
Жула гьунарданун халкьуннал кьимат бивщуну мукьахри цIа кьадрулий кьамул дайсса.
Цаннан ца бувчIлай бушиврул ва жаваблувшиврулли хьун байсса кулпатрал къатта-къала.
Кув чIумал хъинну захIматну бикIай вай жула политиктурал ватан цасса духьунссар куну учин, диркIссания, ваксса укун цаннал ца къалилланссия.
Дустал хъиннува чIяву хьусса чIумал, чIири личIайссар дусшиврул цIакьшиву.
Лахъи бара зула оьрму ххуйшиврийну ва хъиншиврийну. сситтул ва оьшиврул хъинну кутIа байссар оьрму.
Агарда жува инсантал бухьурча, жува циняв ца тайпалуллу. Муния ливчуну махъри бикIан бюхъайсса миллатру ва умматру.
Лакку мазрайн бувцуссар
Руслан Башаевлул
