Гьашину январьдания шиннай жулла республикалий ларсун дур 11 азарда тонна ахънилссаннул, миннувату – 8 азарда тонна помидордал ва 3 азарда тонна нисвартилул. Муния бувсунни Дагъусттаннал Шяраваллил хозяйствалул ва бакIлахъиялулмур министерствалул зузалтрал. Минналва бусаврийну, дукIу вара чIумал республикалий ларсун диркIссар сайки 10 азарда тонна ахънилссаннул.
ХIакьинусса кьини теплицардаву ахънилсса ххяххан давриву хьхьичIунсса кIанттурду бугьлай бур Къарабудагъккантуллал, Къизилюртуллал ва Къая­ккантуллал районнал хозяйствар­ттал ва КФХ-рдал. «Дагъусттаннай гьар шинах ахънилсса дугьаву гьарза хъанай дур, интенсивсса технологияртту ишла дуллалаву сававну. Мунияр ххишалагу, гьарта-гьарза дуллай бур кIинтнил теплицардал аьрщив, утти ишла дуллан бивкIунни щаллусса шинал лажиндарай теплицардаву ахънилсса ххя­ххан даврил технологияртту. Министерствалул бусаврийн бувну, ларкьусса аьрщарай ахънил­сса ххяххан даву хъанахъиссар «Мюнпатсса АПК» ва импортозамещениялул программар­тту дузрайн дуккан даврил ца яла агьамми ххуллурдуну.
ДакIнийн бутанну, Дагъус­ттаннай теплицардал комплекс­ру бувну бур 200 гектарданияргу ххишаласса аьрщарай.

Нувщигу, ахъулссагу, ахънилссагу
Республикалул хозяйствар­ттаву дукьлай бур ахънил­сса, ахъулсса ва нувщи.
ДР-лул Шяраваллил хозяйствалул ва бакIлахъиялул министерствалул прессалул къуллугърал бувсъсса куццуй, ахънилсса дуркьун дур 18 азаллий 910 гектарданияту, цинярдагу 638 азаллий 669 тонна, ца гектардания 337,7 центнер хIисавну. Шиккува кIицI бан, дукIу вара чIумал дуркьун диркIссар 562 азаллий 658 тонна. ХьхьичIунну зий дур Дарбантуллал (293,5 азарда тонна). Хасавюртуллал (88 азарда тонна) ва МахIарамккантуллал (61,5 азарда тонна) районнал хозяйствартту.
Нувщи бавтIун бур 6 азаллий 148 гектарданияту, цинярдагу 183 азарда тонна. Миккугу хьхьичIунну зий дур Хасавюртуллал (28 азарда т.) ва Дарбантуллал (18 азардаксса т.) районнал хозяйствартту.
Ахъулсса дуркьун дур 10 азаллий 987 гектардания, цинярдагу 92 азаллий 30 тонна. ХьхьичIунну зий дур МахIарамккантуллал (26 азарда тонна), Сулайман-Стальскийл ва УнцIукIуллал (10 азарда тонналия лирчусса) районнал хозяйствартту.

ХIадур бувссар
ХIасан Аьдиловлул