Дагъусттаннал силистталул комитетрал МахIач­къалалиясса кIия адиминал хIа­къираву сукку дунни уголовное дело.

Миннайн щак тIий бур респуб­ликалул строительствалул, архитектуралул ва ЖКХ-лул министр авцуну, му итаакьинну чIярусса арцу тIалав дуллай бивкIшиврий. Силистталун щак багьлай бур министр ттупанча бурган бувну, нигьал увну авцушиврий. Ва авцуминнан миллионну арцул ччай бивкIун бур тархъан анну. Министр авцуну хъирив кьини, июль зурул 21-нний, тIалав дуллалисса арцул дачIи – 30 миллион ласлай бунува, кIиягу адимина бувгьуну бур СКФО-лийсса Аьрасатнал МВД-лул Агьаммур управлениялул, Дагъусттаннал УФСБ-лул ва Къабардин-Балкьарнал Росгвардиялул зузалтрал. Бувгьуминнай тахсир ккаклай бур, ца-кIия цачIун хьуну, инсан ацаврил (ст.126), чIярусса арцу цIиклакаврил (ст.163) ва закондалуцIун къабавкьуну ярагъ ишакаш баврил (ст. 222).
— Тахсир хьуми дуснакь бансса танмихI кьукьин тIий бур, — буслай ур Силистталул управлениялул вакил Расул Темирбеков.
Ванал бусласимунийн бувну, тахсиркартуран министр тархъан анну 50 миллиондалия лирчусса арцу ччай диркIун дур.

Лажин хIадур дурссар
А. Аьбдуллаевал