Дагъусттаннал паччахIлугърал университетраву 70-кусса шиннардий математикалул факультетрай дуклай бивкIсса студентътал хIакьинусса интернет-сайтрай тIий бур укун: «Ванал лекциярттах жу вичIи дирхьуну бикIайссияв, Заннал зуматусса калималух кунма». Миннал укун дакIнийн утлатисса инсаннугу хъанахъиссар ХIусайннул арс Мухтар Аьлишаев, техникалул элмурдал доктор, профессор.

Студентътурал тIимур хIакь­сса затри, ххаллилсса лектор хIисаврай Мухтар Аьлишаевлул цIа мудангу машгьурну дикIайссия. Ванал ихтилат­раву чара бакъа дикIайссия дакIнивун дюхлахисса дикция, миннуцIун – цалла предмет ванан ххишала дакъа куртIну кIулну душивугу.
ХIусайннул арс Мухтар Аьли­шаевлул элмулул бюх­ттулшиврийнсса ххуллу байбивхьуссар Лакрал райондалийсса ШавкIуллал шяравату. Увссар Мухтар июль зурул 20-нний 1932-кусса шинал чIявусса оьрчIру бу­сса кулпатраву. 1949-кусса шинал мусил медальгу хъиривну къуртал бувссар та заманнай хъинну цIанихсса Гъумучиял учкъула. Мукунма медаллащал та шинал учкъула къуртал бувну бивкIссар ХIажи Мащилиевлул ва Нураттин Маммаевлул. Шамагу най бунува, лавгун, бувхссар Ломоносовлул цIанийсса Москавуллал паччахIлугърал университетравун. Мащилиевлуяту хьуссар республикалий цIа дурксса юрист, Маммаевлуяту хьуссар дахIалай чинсса математикалул учитель (ванал арс Сулайман хIакьину зий уссар Да­г­ъусттаннал медициналул академиялул ректорну). Аьлишаевлул 1954-ку шинал марцIсса ххювардай къуртал бувссар механика-математикалул факультет. Найунува аспирантуралувун уххан маслихIат бувну бивкIун бунугу, цала ичIаллицIун дархIусса захIматшивуртту сававну, ни­ттил чIарав ацIан багьлай буну тIий, увкIссар Дагъусттаннал хъаннил педагогикалул институтравун дарс дихьлан. Зийгу ивкIссар микку ххюра шинай. 1959-кусса шинал увхссар МГУ-лучIасса аспирантуралул механикалул отделениялийн ва лайкьну дурурччуссар диссертация. Аспирантура бувккуну махъ ванайн оьвкуссар зун Татарнал Бугулма шагьрулийсса НИИ-лул секторданул каялувчину. Мичча ялагу Дагъусттаннайн кIура авну, зун ивкIссар Дагъпединститутрал доцентну.
1969-кусса шинал Мухтар Аьли­шаев увцуссар Дагъус­ттаннал паччахIлугърал университетравун, ва чIал къавхьуну увчIуссар математикалул факультетрал деканну. Ва ивтун махъ му факультетрал давриву хьуссар ххуй-ххуйсса хьхьичIуннайшивурттугу.
1973-ку шинал Аьлишаев зун ивкIссар Москавливсса ВНИИНИТ-рал элмийсса хъунама зузалану ва чIал къархьуну дурурччуссар докторнал ди­ссертация – «Гидродинамические основы разработки нефтяных месторождений со структурно-механическими свойствами в пластовых условиях» тIисса темалийсса.
Докторнал диссертация дурурччуну мукьах Аьлишаев зун ивкIссар Дагъусттаннал университетраву, вычислительный математикалул кафедралул каялувчину ва чIал къавхьуну му кафедралул даву ванал гьаз хьун дурссар лахъсса ххуттайн, ми­кку хIадур буллан бивкIссар ххуй-ххуйсса специалистал.
1983-ку шинал Мухтар Аьли­шаев кIункIу увссар цачIана Да­гъусттаннал политехинститутрал, ва увчIуссар теоретический механикалул кафедралул хъунаману.
Цала пишалул аралуву ХIу­сайннул арс Мухтар Аьлишаев хIисав хъанахъиссар сайки дунияллул лагрулийсса авторитетран. Мунийн бувнур ва, тIалав увну, зун тIайла ув­ккун ивкIсса чил билаятирттайнгу: цал Алжирнавун – 1 шинай­сса, яла Вьетнамнавун – 9 шинайсса.
2015-кусса шинал дунияллийн бувкссар М.ХI. Аьлишаев автор­сса «Моделирование и расчет в прикладной механике и добыча нефти» тIисса ляличIисса лу, цувгу буккин ва лахьхьин ккаккан бувну бусса му аралул специалистуран. Ва лу кьимат­рал хъинну лавайсса лур.
Утти, вай жува куцири затирттал хъирив, хIасулгу хъанай бухьунссар суал: «Ци-ци наградартту дуссар, ва аьлимчунан дурмунин кьимат бивщуну, дуллусса?» – тIисса. Наградар­ттуми дакъа­ссар цукунчIавсса! Мунил хъунмур сававгу ванал цалла иминшивур, хасиятрал кIукIлушивур. Ва тачIаввагу зана-кьулу хъанай ивкIсса инсан акъар я элмулул официалсса суккушиннардаву, я партиялул сакиншиннардаву. Оьр­му гьан бувну бур, хьхьичIунгу урувгун, так зий, захIмат буллай, элмулул кьюлтIшивуртту ттирикIлай, ттириркIумур мюнпатирттайн ду­ккан дуллай.
Оьрмулул юбилейгу барачат дуллай, чIа учинну лакрал ва Дагъусттаннал лайкьсса арснан лахъисса цIуллусса оьрму!
ХIажи МахIаммадов,
математикалул элмурдал доктор, профессор