Виричу дакIнийн увтунни

Дагъусттаннал Виваллил иширттал министерствалул гьурттушинна дунни Аьра­сатнал Виричу МахIаммад НурбахIандов ва мунал ссурахъу Аьвдурашид НурбахIандов аьпалул хьуну шин бартлаглагисса дягъулул митинграй.

А. Аьбдуллаева
Митинграй гьурттушинна дан Белгород шагьрулия цила гъан-маччаминнащал бувкIун бия МахIаммад НурбахIандовлул къучагъшиврия поэма чивчусса 42-мур школалул дуклаки душ Юлия Калинина. Вокзалданий вайннал кулпат хьунабакьин бувкIун бия Дагъусттаннал виваллил иширттал министр, полициялул генерал-лейтенант Аьвдурашид МахIаммадов, Дагъусттаннал Национал гвардиялул федерал аьралуннал управлениялул хъунама, полициялул полковник МахIаммад Баачилов, МВД-лул УРЛС-лул хъунама, виваллил службалул полковник Сахават Сахаватов ва Виричунал ппу НурбахIанд НурбахIандов.
Аьвдурашид МахIаммадовлул барчаллагь увкунни Юлия Калининахь, мунил ниттихь Галинахь ва уссихь Вадимлухь Дагъусттаннайн бувкIун тIий.
— Вай дакIнийхтуну чивчусса шеърирдаву къявхъа тIий дур буттал кIанттухсса ччаву. Жу барчаллагь тIий буру жула ватанлувнал дурсса къучагъшиву шеърирдай абад дурсса Юлияхь ва укун­сса душ тарбия бувсса ниттихь, — увкунни министр­нал.
Виваллил иширттал органнал сий гьаз даврил цIаний дуллалисса даврихлу ванал дуллунни хIурматрал грамотартту Юлиян ва Галинан. Ахирданий цинявн­нал тIутIив дирхьунни МВД-лул къатрал хьхьичI дацIан дурсса къуллугърал бурж биттур буллай жанну дуллусса зузалтрал гьайкалданучIа.
— На хъинну ххарира зул аьрщарайн бучIан бювхъуну тIий, ттун ххуй бивзунни Дагъусттан, шиккусса инсантурал тарбия, узданшиву. Хъиннува ххарира МахIаммад НурбахIандовлул буттал шяравалу ккаккан бюхъаврия. Ва бунияла­сса Щалагу Аьрасатнал пахру бансса виричури, патриотри, — увкунни Юлия Калининал.
Вай гьантрай Калининхъал кулпат буцинтIий бур Дагъусттаннал тарихрал ва культуралул гьайкаллу ккаккан дан.
Аьрасатнал Виричунал цIа лайкь дурсса МахIаммад НурбахIандов ва Къучагъшиврул Ордендалун лайкь хьусса Аьбдурашид НурбахIандов оьрмулуцIа бувну шин бартлаглагаврицIун дархIусса мероприятияртту хьунни Сергокъалаллал шяраваллил майданнив.
ДакIнийн бутан, 2016 шинал июль зурул 9-нний Сергокъалаллал шяра­валлия арх бакъасса вацIлуву цала гъан-маччаминнащал бигьалаглай бивкIссар МахIаммад ва Аьбдурашид. КIюрххицIунмай вай бусса палаткалучIан увкIун ур ярагъуннил алгусса ххюя инсан. Миннал цал бивтун увтун ур цайна ма­хъунай кIураавсса Аьвдурашид. МахIаммад полициялул зузала усса кIул шайхту, муная тIалав буллан бивкIун бур цала коллегахъахь полициялул органнава насира уча тIий. Экстремистътурал тIимур къабарча, цува ивчIантIишивугу кIулну бунува, МахIаммадлул, хIучI къаукуну: «Зузияра, уссурвал!» — увкуну бур лахъну, кьутIинну. Аьрасатнал Президентнал хIукмулийну (№486, 21 сентябрь 2016 ш.) полициялул лейтенант МахIаммад НурбахIандовлун къуллугърал бурж биттур буллай ккаккан дурсса къучагъшиврухлу, аьпалул хьуну махъ, дуллуссар Аьра­сатнал Виричунал цIа.
Виричунал нитти-буттащал хьунаавкьусса чIумал, В. Путиннул увкуна: «Зул арс цила икIайкунсса виричури, му махъва-махъсса ссихIирачIагу цала къуллугърайн хаин къавхьуссар», — куну.
Вара кьини Лаващиял райондалул Виваллил иширттал отделданий хьунни НурбахIандовлул аьпалунсса мотопробег.
Митинг дайдирхьунни ссят 10.00 хьу­сса чIумал. Уссурвал НурбахIандовхъал аьпалун дунни минутIрайсса пахъ багьаву. Хъирив Дагъусттаннал Виваллил иширттал министерствалул каялувчитурал цIания ихтилат бунни виваллил службалул подполковник Илгам Агъаевлул.
Хъирив митинграйн бавтIми ва мотопробеграву гьуртту хьуми бувкIунни Сергокъалаллал 2-мур школалучIан ва М. НурбахIандовлул къатрачIан.
Шикку мемориалданул улттучIа дирхьунни тIутIив.
Калининхъал кулпат кьамул бунни Дагъусттаннал БакIчи Рамазан Аьб­­­дуллатIиповлулгу. Республикалул БакIчинал Юлия Калининан дуллунни АхIмад-Хан Султаннул медаль.