Москавлия бахшишран – троллейбусру

Москавуллал ХIукуматрал бахшишран жула хъуншагьрулун 15 троллейбус тIайла буккантIий бусса бур.

З. АьбдурахIманова
Укунсса бахшиш тIайла ду­ккан ва кьамул дан хIукму хьуну бивкIссар гьашину февраль зуруй кIивагу шагьрулул каялувчитал хьунабавкьусса батIаврий.
Вана ахиргу июльданул 6-нний хьусса «Moscow Urban-2017» форумрай Москавуллал ва МахIачкъалаллал цачIусса меморандумрай къулбасру дирхьуну. Ва иширал хIакъиравусса мажлисрай гьуртту хьуну ур Москавуллал транспортрал инфраструктуралул Департаментрал хъунама Максим Ликсутов ва МахIачкъалаллал бакIчи Муса Мусаев.
Хъиривва МахIачкъалаллал троллейбусирттал управлениялул пишакартал тихун лавгун бур троллейбусру язи бугьан ва ми бувцуну шихун бучIан.
Шиккува ххи бан, ва шинал ахирданийннин троллейбусирттал управлениялул ларсъсса лизинграйну ттигу 13 троллейбус ласунтIиссар шагьрулул кIичIирттавух занан.