Агьалинал масъалартту щаллу бан бакIрайн лавсунни

Июнь зурул 28-нний «Единая Россия» партиялул бакIчи Дмитрий Медведевлул региондалийсса приемныйлуву ПаччахIлугърал Думалул депутат, ЦIуллу-сагъшиву дуруччаврил комитетрал член Аьвдулмажид МахIрамовлул кьамул бунни республикалул агьали.

ПаччахIлугърал Думалул депутатнащал хьунабакьин аьрза чивчуну бия 15 инсаннал. Миннал буруккинтту личIи-личIисса бия, къатта-къушлил, давурттал дузалшиннарая байбивхьуну, ЖКХ-лул хIаллихшиннардайн бияннинсса. 1-мур группалул инвалид Адам Камалов, цала мушакъатшиврух къаурувгун, увкIун ия ЦIуссалакрал райондалия, ТIюхчардал шярава.
Ва, цIусса миналий къатри дулун багьлай бунува, хIакьинусса кьинигу мукунминнал сияхIрай акъар. Мунийн бувну Камаловлун гъан-маччаначIа ялапар хъанан багьлай бур. Ванал тавакъю бия депутатнахь цала масъала щаллу бан кумаг бува тIисса. Аьбдулмажид МахIрамовлул махъ буллунни ванал масъалалул хIакъираву прокуратуралийн чичин ва ЦIуссалакрал райондалул бакIчинайн оьвчин.
Къатта-къушлил масъалалулшиврий увкIун ия Ккуллал райондалия, ЧIяйннал шярава Булат МахIаммадовгу. Булат МахIаммадов ур аьрали иширттал ветеран, Чачаннавусса дяъвилул иширттал гьурттучи. Ванал бур кIива оьрчI. АцIния шанна шин хьуну дур Булат МахIаммадовлул ялапаршиндарал шартIру къулай дувара тIий. Депутатнал махъ буллунни ванал масъалалул хIакъираву МахIачкъала шагьрулул бакIчинахь кумаг ба учин.
Ва кьини депутатначIан бувкIминнаву чансса бакъая даврих луглагиссагу. Миннавух бия МахIачкъалалиясса, цуппалу оьрчIру хъуни буллалисса Мадина ХIажихановагу. Мунил хIакъираву Аьбдулмажид МахIрамовлул оьвкунни «Успех» тIисса агьали давурттал дузал байсса центрданийн. Хасавраясса Хизриев МахIаммадлул къуртал бувну бур Дагъусттаннал медициналул академиялул лечебный факультет. Преподавательтурал бусласимунийн бувну, институтраву ва ххуйну дуклай ивкIун ур. Хизриев МахIаммадлул тавакъю бур целевой направлениялийхчIин Москавлив ординатуралувун уххан кумаг бува тIисса. Депутатнал махъ буллунни ванал масъалалулшиврий цIуллу-сагъшиву дуруччаврил министрнайн уккан ва цала кумагчинайн тапшур бунни аьркинсса чагъар чичин.
Ва кьини цачIанма бувкIсса цинявппа инсантурал масъалартту щаллу бан кумаг бан бакIрайн лавсунни Аьбдулмажид МахIрамовлул. МинначIан цала масъаларттал хIакъиравусса жавабру дучIантIиссар ца зурул дянив.

А. Аьбдуллаева