Июльданул 21-нний ччалли дурккунни футболданул командартту – «Анжи» ва «Амкар». ХьхьичIми тIуркIурдай кIирагу команда дух хьунни: жуламур ЦСКА-лия 3:1 счетращал, «Амкар» Грознай шагьрулий «Ахмат» командалия 1:0 счетрайну.
ТIуркIулул дайдихьу хьунни жула командалул балжи-биту ялтту буклай. Мукьийла жула гьужумчи ХIасан Мамтовлул бивщусса ттуп бувгьунни «Амкардул» къапучи Неъматулиннул. 23-мур минутIрай хьунни гол:
майданналул мурцIния бивщусса, «Амкардул» къапучинал хьхьичI, футболистътурал дянив хъит-шит тIий бивкIсса ттуп, жула защитник Брызгаловлул бивщуну, бавкьунни «Амкардул» къапулувун.
Муния махъгу чан дакъая муттаэтурал къапулувун ттуп бакьинсса сант-кьудрат, амма ва кьини тIайлабацIу чIарах бувккунни.
Ахиргу, тIуркIу къуртал хьунни 1:0 счетрайну.
Пресс-конференциялий «Анжи» командалул хъунама тренер Александр Григоряннул кIицI увунни цащала ца классраву (Кисловодскалий) дуклай ивкIсса лакку оьрчI Абакаров: «Хъинну аькьлу бусса, МГУ-гу къуртал бувсса гьалмахчу. (Щил, часса урвав? КIул буллай буру).
«Анжилул» хъиривмур тIуркIу хьунтIиссар июльданул 30-нний Москавлив «Локомотивращал».
«Анжи» — «Амкар» — 1:0. Гол бавкьунни Брызгаловлул, 23 (1:0).
«Анжи»: Солосин, Мусалов, Брызгалов, Полуяхтов, Карасев (Гулиев, 55), Адонин, Яковлев, Данченко (Базелюк, 70), Маркелов, Мамтов (Кацаев, 71).
«Амкар»: Неъматулин, Зайцев, Сиваков, Занев, Идову. Гол (Салугин, 64), Шаваев (Комолов, 40), Гиголаев (Конде, 46), Костюков, Бодул, Гасилин.