Жижара

Минкаиллул арс Нарчаев Залимхан

2017-ку шинал июльдалул 15-нний, захIматну къашавайгу ивкIун, бяливчIунни Нарчаев Залимхан Минкаиллул арснал оьрму.

Залимхан увссар 1949-ку шинал ЦIуссалакрал райондалийсса Гьамиящиял шяраву. Гьамиящиял дянивмур даражалул школагу бувккуну, личIи-личIисса кIанттайгу зий ивкIун, 1976-ку шинал дуклан увхссар МахIачкъалаллал автомобил ххуллал техникумравун. Мугу шинал къуртал бувну, зун ивкIссар «Дагавтодор» объединениялул Ламурду бай организациялий. Сайки 40 шинай му организациялий зий, ванал бувну бур ацIнияхъайсса ламурду, ччарча зунттал кIанай, ччарчагу авлахърай. Жунма кIулли циксса чIявусса ламурду бувссарив ва цIу буккан бувссарив махъсса шиннардий анжагъ Лаккуйн­сса ххуллий. Миннуву Залимханнул захIматрал хъунмасса бутIагу буссар.
Дагъусттан Республикалул ПаччахIлугърал Советрал указрайн бувну, 2000-ку шинал Залимхан Нарчаевлун дуркссар «Дагъусттан Республикалул лайкь хьусса строитель» тIисса бусравсса цIа.
Залимхан ия ас-намус ххи­сса, цалла даймуниву ва пахру бакъасса, щил-дунугу цаятура цIа дитанмуниву итххявхсса инсан, чумартшиврул бутIа ххинугу буллусса инсан, махъгу, ишгу бацIан буллалисса чув. Ва ия кулпатрайнгу, гьалмахтурайнгу дакI тIайласса адимина. АрхIалну ххирая ва шавагу, цащала зузиминнангу, гъанминнангу, дус­турангу. Цува кунма, жяматраву бусрав бусса ряхва оьрчI хъуни бувну, лащу-щаллугу бувну, батIул хьунни Залимхан кулпат­раяту, гъан-маччаминнаяту, дус-гьалмахтураяту, жяматраяту.
Залимхан жуятува личIи шаврил хъуннасса кьурчIишиву кIидачIлай, жижара буллай бу­ру кулпатрахь, оьрчIахь, гъан-маччанахь, агьлу-авладрахь, цинявннахьвагу. Алжаннул ххари аннав. РухI рахIатний дишиннав!

Гьамиящиял жямат


АхIмадлул арс Билалов Жамалуттин
Вай гьантрай хар — хавар бакъа инжит хьуну, лавгунни дунияллия Хъусращиял шяравасса ххаллилсса инсан, Да­гъусттаннал лайкь хьусса учитель АхIмадлул арс Билалов Жамалуттин.

Увссар Жамалуттин Хъусращиял шяраву 1954 шинал. Буттал шяраву школа къуртал бувайхту, Дагъусттаннал паччахIлугърал университет­рал химиялул факультетрайн дуклан увххун, му марцIну ххювардай къуртал бувссар. Зун тIайла увкссар ТIюхчардал школалийн учительну. Цаппара хIаллава гьунар бусса учитель цал школалул завучну, яла – директорну ивтссар. Ванал куртIсса кIулшивуртту ва даврил бюхъу чIалай, 2008 шинал ивтссар ЦIуссалакрал райондалул КIулшиву дулаврил управлениялул хъунаману. 2012 шинал ЦIуссалакрал райондалул ЧС-лул иширтталсса буллали­сса управлениялул хъунаману зун ивтссар. Гьашину январь зуруй цIуницIа ТIюхчардал школалийн директорнал къуллугърайн зана хьуну, микку зий уссия. Райондалий кIулшиву дулаврил даву ларайсса шачIанттайн гьаз дувавриву Жамалуттиннул бутIагу буссар. АрхIал зузиминнаву, дуклаки оьрчIаву, жяматраву мунал цIанил хIурмат хъунмассар. Цала даву ххуйну кIулсса педагог, аькьилсса тарбиячи, ххуйсса сакиншинначи хIисаврай акъагу, Жамалуттин агьалинан бусравссия, райондалул оьрмулул иширттавух мудангу чялишну хIала уххайсса инсан хIисаврайгу, дакI- аьмал хъинсса, хъамал ххирасса зунтталчу хIисаврайгу. Жамалуттин АхIмадович дунияллия лагаврил кьурчIишиву кIидачIлай, жижара буллай буру мунал арсваврахь Расуллухь, Рашидлухь, душнихь Жамилахь, миннал наслулухь, ниттихь Шагьуннухь, уссурваврахь Камалуттиннухь, Сулайманнухь, Багьауттиннухь, ссурваврахь Марияхь, Розахь, Луизахь ва цинявппагу гъан- маччацириннахь. Жамалуттиннул рухI хъинний дишиннав, Алжаннул агьлулувух уваннав, мунан къабуллумур оьрмулул бутIа наслулун ххи бувну лякъиннав.

Хъусращиял жямат, ЦIуссалакрал райондалул жямат


ДакIнихтунусса кьурчIишиву кIидачIлай, жижара буллай бура ттунма ххирасса Хъусращиял шяравасса Билаловхъал щалвагу тухумрахь, миннал ххирасса
Жамалуттин АхIмадович
дунияллия лагаврийн бувну. Махъминнал оьрмурдай барачат бишиннав, зухьхьунна цIуллушиву дулуннав!

ПатIимат Рамазанова


МахIаммадлул арс Къардашов ХIажи
Ва зуруй, оьрмулул 76 шинаву, аьпалул хьунни ГьунчIукьатIрал шяравасса ххаллилсса чув Къардашов ХIажи МахIаммадлул арс.

ХIажинал чIярусса шинну дурссар асфальтрал ва бетондалул заводрай сварщикну зий. Ва ккаллину икIайссия лавай­сса даражалул пишакарнан, ванал хIурмат хъунмая зузисса коллективравугу, кIулминнал дянивгу.
ХIажи аьпалул шаврил кьурчIишиву кIидачIлай, жижара буллай буру ванал кулпатрахь Маликатлухь, ссурваврахь, арснахь ва душнихь.
ХIажинал бунагьирттал аьпа буваннав, рухI хъинний дишиннав. Ванан къабуллумур оьрмулул бутIа махъминнан буллуну лякъиннав.
ГьунчIукьатIрал жямат