Дагъусттаннал Авиалиниярттай 25-нния лирчусса шиннардий пилотну лехлай ивкIсса Ххюлусматусса Рамазан ХIайдаров вай гьантрай цалчин левххунни ЮТэйр авиакомпаниялул самолетрал капитанну.
И. Саидова
Рамазан ХIайдаров уссия 2012 шиная шихунай ва авиакомпаниялий кIилчинма пилотну лехлай. Гьавалул жамилул капитан хIисаврайсса цалчинсса рейсгу дунни ванал цала Ватандалийн – Дагъусттаннайн.
ХIайдаров ур опыт бусса, 30-нния лирчусса шинну авиациялий зий дурсса пилот. Авиациялий зузиссаксса хIаллай 12 азарунния лирчусса ссятру хьуну дур ванал ссавруннайх лехлай.
ЦIуну хьусса капитан барча уван ва му хьунаакьин аэропортрайн бувкIун бия Рамазаннущал архIал зий бивкIми ва авиапредприятиялул зузалт.
Рамазан ХIайдаров барча уван увкIсса Авиапредприятиялул хъунама директор Арсен ПирмахIаммадовлул дуллунни ванан Дагъусттаннал Авиациялун 90 шин шаврил юбилейран хас дурсса медаль, ХIурматрал грамота ва дакIний личIансса бахшишру.
