Июль зурул 18-нний МахIачкъалаллал аэропортрай бунни авиапредприятиялул зузалтрал оьрчIансса экскурсия. Вайннахь бувсунни пассажиртурал мюхчаншиву дуруччаву мурадрай дуллалисса давурттая ва аэропортрай цIуну буллалисса терминалдания.

И. Саидова
ОьрчIан ТУ-154 самолетрал салонгу ккаккан бувну, гъира буминнахьхьун ихтияр дуллунни штурвалданух щябикIансса.
Мукунма оьрчIахь бувсунни Росавиациялул ххассал бувултрал даврия, ккаккан бунни цIуллу-сагъшиврул мушакъатшиву дусса пассажиртуран кумаг байсса куц. ЦIуллу-сагъшиврул мушакъатшиву думиннансса амбулифтрай кук­луну ва бигьану самолетрал салондалувун гьаз хьусса оьрчIру махIаттал хьуну бия.
Шиккува кIицI лаганну махъсса ппурттуву аэропортрай дуклаки оьрчIансса экскурсиярду ччя-ччяни шайшиву. Укунсса экскурсиярдай гьуртту хьун ччиминнан ихтияр ласласисса аьрза чичин аьркинссар авиапредприятиялул хъунама директорнайн.
ХIакьинусса кьини МахIач­къалаллал аэропортрая Аьрасатнал шагьрурдайн ссятрал мутталий лехлай ур 200 пассажир, дазул кьатIувсса билаятирттайнгу ссят­рал мутталий – 60 пассажир.
2016 шинал февраль зуруя байбивхьуну, аэропортрай буллай бур 8000 квадрат метра ду­сса, 190 пассажир ссятрал му­тталий кьамул уван бюхъайсса терминал.
2017 шинал май зурул 3-нний МахIачкъалаллал аэропортра­хьхьун ихтияр дуллунни хъунисса салонну бусса Boeing-767-200, Boeing-767-200ER, Boeing-767-300, Boeing-767-300ER ва Airbus A-330-200 модификациярттал самолетру кьамул дуллансса.
Гьарица кьини МахIач­къалаллал аэропортрая Мос­кавлий лехлай дуссар 10-хъул самолетру, мукунна шичча самолетру лехлай дуссар Санкт-Петербурграйн, Сургут­райн, Ростоврайн, Сочилийн, Минводылийн, Къазахъисттаннайн, Туркнавун ва цаймигу кIанттурдайн.