Бархъаллал шяравасса ХIам­мади МамматIиевлуя чIя­вучин бавссар. Бархъаллал шяравун увкIсса сайки гьарца чувгу хьхьичIа-хьхьичI ачайссар музейрайн кIура дарсса ванал къатравун.
Музейравусса циняв жура-журасса экспонатругу ванал цала каних дурсса дур. Вих къахъанай, махIаттал хъанан бикIай, вай ХIаммадил ца каних дурсса давуртту душиву кIул хьувкун. Оьр­мулул 7 шинаву хьусса апатI сававну, ХIаммади ца каницIа хьуну ур. Амма ва, цала яхI бушиврул дакI гъагъан къаивкIун, цайминнал кIира канихрагу къадаймур ччима хIайран уванну ца каних дуллай, бусравну оьрму бутлай ур.
Вай гьантрай ХIаммадил оьр­мулун 80 шин бартлаглай дур. ЦIанакулгу, оьрмулул шиннардих къаурувгун, уххаву къакIулну зий ур. Буниялагу ванал канила дукъаккайсса даву дакъар: ябацIансса ххаржантру, чIиллу, миннунсса кьуртти, къуннагъру, тIахIунттансса ва бартбисурттансса накьичру, инсантурал, жанаварт­рал къалипру…
Цуксса яхIгу, ссавургу ду­сса икIан аьркинни ца каних вайксса давуртту дайсса адимина. ХIаммади шяраваллил жяматрангу акъа чара бакъасса инсан ур. Чан къашай ванал ужагърай муму-тамур дува тIий букIлакIисса инсанталгу. Ца-ца чIумал пикри шай ,кIирагу ка диркIссания, ХIаммадил жамигума банссия тIисса.
Шяраваллил жяматрал лажинну хъанахъисса, хIурмат лавай­сса ХIаммадий! Барча дуллай буру вил оьрмулул юбилей! ЧIа тIий буру цIуллушиву, гьарца ишираву тIайлабацIу.
ОьрчIалгу, оьрчIал оьрчIалгу ххари уллай личIаннав ина бусса оьрмулий!
Цинявппагу вил хIурмат буми