Июль зурул 14-нний къуллугърал бурж биттур буллай жанну дуллусса полициялул зузалтрал оьрчIру тIайла бувккунни бигьалаган Бурятиянавусса лагерьданийн.

Дагъусттаннал виваллил иширттал министр Аьбдурашид МахIаммадовлул цинявппагу цала зузалтрал цIания барчаллагь увкунни даврил сиптачи, Бурятиянал виваллил иширттал министр, полициялул генерал-майор Кудинов Олег Филлиповичлухь, буттахъацIа хьусса жула оьрчIайн Байкал бярнил зуманивсса лагерьдай бигьалаган оьвкуну тIий. Гьашину кIилчинсса шинни къуллугърал бурж бартбигьлай жанну дуллусса Дагъусттаннал полициялул зузалтрал оьрчIру ва лагерьдай бигьалаглагисса.
ОьрчIру аьрххилий тIайла буккан увкIун ия цува министр.
— Ттун щак бакъар зу зува лавгсса кIанай жула республикалул цIа лайкьну дуруччиншиврий. Ва аьрххилий зун ккаккантIиссар дазу-зума дакъасса жула билаятрал ца мурцIу, зу кIулхьунтIиссару ва дусшиву дантIиссар цайми регионнаясса оьрчIащал. Аьрххи-ххуллу тIайлабацIусса хьуннав, ххуйну бигьагу лавгун, дакI ххарину зана хьуннав, — увкунни Аьвдурашид МахIаммадовлул.
Хъирив цинявннал тIутIив дирхьунни къуллугърал бурж биттур буллай жанну дуллусса полициялул зузалтрансса гьайкалданучIа.

А. Аьбдуллаева