«Ххувхьуншиврун жущава шаймур буллай буссияв»

Июльданул 15-нний «Анжи-Ареналий» МахIачкъалаллал футболданул команда «Анжи» ччаллий дурккунни Москавуллал «ЦСКА»-ращал.

Ва бия жула командалул Аьра­сатнал футболданул чемпионатрал цалчинсса тIур­кIубуккаву.
Дайдихьу хьунни тIайлабацIу бакъасса. Дагъусттаннал командалул къапулувун гол бавкьуна 21-мур минутIрай. ЦСКА-рал угловойрая бивщуну махъ, ттуп Васиннул бакIрах гьан бувунни «Анжилул» къапулувун. МахIачкъалаллал командалул ишла къадурунни цинна дуллу­сса каширду. Маркеловлул бивщусса ттуп бувгьунни «ЦСКА»-лул къапучи Акинфеевлул, цаппара минутIрава Липартиялул гьан бувсса ттуп къапул ялтту левххун лавгунни.
КIилчинмур таймрал байбихьулий ЦСКА-рал полузащитник Головиннул 20 метралия бивщусса ттуп тIайла бавцIунни къапулул мурцIнийн. Гол. 64-мур минутIрай «Анжилуща» хьунни цала гьужумрал ахирданий ттуп бакьин ЦСКА-лул къапулувун. Счет цакуцну дацIан дан хьунссия, «Анжилул» полузащитник Кацаевлул бивщусса ттуп ЦСКА-лул къапулувун тIайлабавцIуссания.
«Анжи» духкъахьуншиврул умуд кьувкьунни 79-мур минутIрай пенальтилия ттуп бавкьусса Натхол. Ахиргу ххув хьунни ЦСКА 3:1 счетрайну.
«Анжи» командалул хъунама тренер Александр Григоряннул пресс-конференциялий увкунни: «Ххувхьуншиврун жущава шаймур буллай буссияв».
«Анжилул» хъиривмур тIур­кIу хьунтIиссар хIакьину «Анжи-Ареналий» «Амкардущал» июльданул 21-нний.
«Анжи» – «ЦСКА» — 1:3
Голлу бавкьунни: Васин, 21 (0:1); Головин, 49 (0:2); Маркелов, 64 (1:2); Натхо, 79 (1:3).
«Анжи» — Солосин, Мусалав, Фибел, Брызгалов, Полуяхтов, Афонин, Карасев, Гулиев (Данченко, 46), Яковлув (Кацаев, 69), Липартил (Мамтов, 56), Маркелов.
ЦСКА: Акинфеев, Васин, В. Березуцкий, А. Березуцкий, Натхо (Кучаев, 83), Вернблун, Головин, Щенпиков, Феркандес, Дзагоев (Чалов,64), Витиньо (Жамалетдинов, 89).