Итникьини Карашрал къутандалий хьунни гиккува ялапар хъанахъиссагу, Лаккуя ва шагьрурдая бувкIссагу шяраваллил жямат­рал батIаву.

Гьуртту хьунни му батIаврий Лакрал райондалул шяраваллил хозяйствалул управлениялул каялувчи Макьсуд Кьадиев, къутаннайсса хозяйстварттал иширтталсса буллалисса пишакар АьлихIажи Мавранов, Карашрал шяраваллил администрациялул бакIчи Захар ХIусайнов. Муний ххал бигьлагьисса яла агьаммур суал бия СПК-лул цIусса председатель увчIаву. Му къуллугърайн увчIин жяматрал рирщуна кIира цIа – Къаллаев ТIагьирдул ва Жумагарова Булбуллул. ЧIявуминнал чIурду буллуну, увчIунни Аьппаслул арс Къаллаев ТIагьир.
ЦIуну увчIусса каялувчинайн пачат тапшур буллай, СПК-лул хъунама Исмяил Оьмаровлул кIицI лавгунни кIира шинал лажиндарай цала тIайланмасса буржирдаха багьайкун зун бюхълай къаивкIшиву цува, чIярусса шиннардил мутталий цалийн къабагьавайсса масъалалул ялув судирттайх заназаву ялтту дурккун. Барчаллагь увкунни давриву цала чIарав бивкIминнахь.
— Ттунма кIулссаксса, жула шяраваллил вив ци иш хьурчагу, неххал тия чулийн чIу-чIитI къабуккайсса бивкIссар. Хъинну кувннащал кув бавкьусса, кувннал кувннал хIурмат бусса агьулдануву, СПК-лул хъунама тарс ацIаву сававну, хьунни цимирагу тIааьндакъашиву, лирчIунни жяматрал дянив циняв ца хьуну дан­сса цимирагу даву. Къуллугъ бугьаву гьунар бакъар. Къуллугъ кIунттил бувгьукун, агьалинал вихшалдаран лайкьну уккан аьркинссар. На жяматрал тIутIимуних вичIигу дишинтIиссар, жяматращал авкьуну зугу-зунтIиссара. Клуб, колхозрал идара лекьавайсса тагьарданий бур, совет заманнайра дуллай дачIину лирчIсса къатри дур магъи лакьиннинна лекьавай. Ттул ният дуссар ца зурувун вай идарартту бакьин бансса. Микку зунсса усттарталгу хIадурну буссар.
Карашрал колхоз ятту-гъаттара гьарзасса, хьхьичIунну зузисса хозяйство дуссия хьхьичIра, ХIурматрал улттуйн лархъун дикIасссия.
ТтиликIрах гъалгъа тIун ччай акъара, амма хIакьинусса кьининин ва хозяйствалий ливчIун бур бувагу 150 яттил хIайвангу, 16 лухIи ризкьигу. Лаккуйгу, къутандалийгу дансса давуртту тIурчаннив, лап чIярур, — увкунни цала лавхъсса мукъуву ТIагьир Къаллаевлул.
2007 шиная шинай СПК-лийн багьайсса ччанавккусса масъалар­ттал ялув чIявусса кIани-кIанттурдайх уклай ивкIсса Рашид Исяевлул бувсунни Ессентукилий хьусса махъва-махъсса судрал хIукму жяматрал чулий кьувкьушиву.
ЦIуну увчIусса СПК-лул хъунаманан тIайлабацIу чIа тIий, Карашрал шяраваллил бакIчи Захар ХIусайновлул бувсунни ТIагьир шяраву цала сипталийну, цала харж-хурж буккан бувну чIярусса давур­тту уттинингу дурсса, жяматран багьавай бусрав хьусса чув ушиву. Шяраваллил администрациялуцIунгу, жяматрацIунгу авкьуну зунтIишив­рийн хъуннасса вихшала душиву.

Зулайхат Тахакьаева