Дагъусттаннай 2008 шиная 2010 шинайннин жиндралшиврул азарданул 5 инсан ивкIуну ур. ДР-лул Россельхознадзорданул управлениялул дурсса хъиривлаявур­ттайн бувну, жиндрал хьусса, къашавайсса жанаварт сававну азар ппив хъанахъаврил тагьар хъинну нигьачIисса кIанайн дирну ду­сса дур.

З. АьбдурахIманова
Ва шинал 5 зурул дянив 1918 инсаннайн жанавартрал кьацI увкуну бур. Вара чIумух ларгсса шинал 2006 инсаннайн кьацI увкуну бивкIссар. Миннува ца МахIачкъалалив 566 инсаннан цIунцIия хьуну дур. Аьм­с­са сияхIрава 36, 5% бур 14 шин хьун дурасса оьрчIайн кьацI увку­сса иширттал.
Маэшатран хьусса арцул зараллая бусларчан, масалдаран, гьашину 5 зурул дяниву цIунцIия хьу­сса къашайшалтрайн бувсса дарур­тту, вакцинарду 9,8 миллиондалун бавцIуну бур. Жанаварт сававну цIунцIияртту хьусса къашайшалт хIакинтурал кумаграл хъирив яла гьарзану бувккун бур Къизилюртлив (131,1), Ю.Сухокумскалий (125,1), Къизлардай (98,3), Къумтуркъалаллал райондалий (86,9), Ккуллал райондалий (117,2) , Дарбантуллал райондалий (95,9), ва Сергокъалаллал, Тарумовкаллал, МахIарамккантуллал, Къизилюртуллал районнай.
Жанаварт сававну хьусса цIунцIиярттал 60 % хъунмурчIин хьуну бур ккаччив ххявххун – миннува шаппасса ккаччал кьацI куну бур 33%, ва 21% – шярал кка­ччал. 30 % цIунцIиярттал хьуну дур ччитри сававну – миннува – 15% шаппасса ччитрал ва 11 % – шярал ччитрал.
БатIаврий республикалул муниципалитетирттал бакIчитурайн тапшур бувунни, цалла-цалла районнай хасъсса комиссияртту сакин бувну, жиндралшиврул азарданун дайшишрулунсса давуртту дуван. Мукунна вайннай дюъ дирхьунни шярал ккаччив, ччитри батIайсса, цIинцI-ччюрк дичайсса кIанттурдай низам дуван. Ялув бивхьунни къул­чча кIулли къабагьаншиврул дезинфекциялул давуртту дуван, цала-цала бюджетирттава вай давур­ттансса арцу итадакьинсса чаранну лякъин, шаппасса ккаччив-ччитри сияхIирттайн лавсун, миннуйн жинд­рал къашай азарданул вакцинарду буллан ва цаймигу давуртту.
Республикалул Ветеринариялул комитетрайн тавакъю бувунни вакцинарду машан ласун харж-хуржлил хIакъиравусса чагъар хIадур бан, Халкьуннал Мажлисрай ххал бигьиншиврул.
Бувунни цаппара амрурду ДР-лул ТIабиаьтрал сурсатирттал ва экологиялул министерствалийнгу. Миннува цаппара бия авла­хъирттай, лухччай жиндралшиврул азардал кюртти чув бурив хъирив лавну, азар ппив шаврил сававрттал ялув бацIан.
ДР-лул ЦIуллу-сагъшиврул министерствалийн тапшур бувунни жиндралшиврул азардан хасъсса хIакинтурансса семинарду сакин буван, циняв азарханардай ва азарданунсса дару-дарманнал тагьар ци дурив ххал дан ва халкьуннал дянив профилактикалул ихтилатру бавуртту дуллан.