МахIачкъалалив, Дусшиврул къатлуву, хьунни хIажлилсса буллалисса Аьрасатнал идаралун (хадж-миссиялун) 15 шин шаврин хас дурсса батIаву.

Шикку гьуртту хьунни Дагъусттаннал БакIчи Рамазан АьбдуллатIипов, Федерал Мажлисрал Федерациялул Советрал председательнал хъиривчу Илияс Умаханов, Туризмалулсса буллалисса федерал агентствалул хъунама Олег Сафонов, Саоьдуллал Аьрабнал Аьрасатнавусса вакил АьбдурахIман бен Ибрагьим ар-Расси, Халкьуннал Мажлисрал депутатътал, ХIукуматрал вакилтал ва рувхIанийсса идарарттал зузалт. Рамазан АьбдуллатIиповлул, хIажлил идаралул юбилей барча дуллай, бувсунни Саоьдуллал Аьрабнал хIажлилсса буллалисса министерствалул хIасиллайн бувну, Аьрасатнал хIаж-миссиялул даву ххуйсса кьиматран лайкь хьушиву, республикалул муфтиятрал, хIажлилсса буллалисса турфирмардал бутIагу бушиву му даву лавайсса даражалийн гьаз шавриву. Илияс Умахановлул бувсунни шиная шинайн хъун хъанай душиву хIаж буван ччиминнал аьдад, Совет заманнай 10 региондалия 20 инсан лагайсса ивкIхьурча хIажлийн, утти 73 региондалия чIявусса инсантал лагайшиву, так ца ларгсса шинал 7000 инсан Дагъусттанная хIажлийн лавгсса хьушиву. Дагъусттаннал муфтий АхIмад-хIажи Аьбдуллаевлулгу бувсунни 15 шинал лажиндарай Дагъусттанная хIажлийн лавгшиву 200 азарунниха ливчусса инсантал, хасну хIажлил масъалартталсса буллансса хIаж-центр тIивтIушиву ва хIажлийн наниминнащал миннан къакIулмур лахьхьин буллалисса аьлимтал ва динчитал лагайшиву. ХIаж- миссиялий каялувшиву дуллалисса МахIаммад ХIамзаевлул балжину бувсунни Аьрасатнаву 2002 шинал хIажлилсса буллалисса Совет хIасул бувния мукьах мунил дурсса давурттая, бувсунни гьар шинах хIаж буллалисса ппурттуву цува каялувшиву дуллалисса идаралул зузалт, группардал хъуними, хIакинтал, гидтал, таржумачитал бавкьуну, цалийн бувкIун зун бикIайшиву ва уттиния тинмайгу мукунма хIарачатрай зунсса ниятрай бушиву.

П. Рамазанова