Агьалинан бигьашиву хьунни

МахIачкъалалив тIиртIунни УМВД-лул Миграциялул масъаларттаха зузисса отделданул цIусса къатри. Шикку гьуртту хьунни Дагъусттаннал виваллил иширттал министр, полициялул генерал-лейтенант Аьбдурашид МахIаммадов,мунал хъиривчу, полициялул хъунама, полковник Сергей Карпов, Аьрасатнал МВД-лул Агьаммур управлениялул Ухссавнил Ккавкказуллал федерал округрайсса хъунама, полициялул генерал-лейтенант Сергей Бачурин.
МахIачкъалаллал Кировский, Советский ва Ленинский районнай миграциялул масъаларттаха зий диркIсса отделлу циняв цачIун дурну, утти цIуну тIиртIусса къатраву зун тIий дур. Вай дур гьарица аьркинмунил дузал дурсса гьарта-гьарзасса къатри. Агьалинан паччахIлугърал хIаллихшиннарду дуллай шикку зий бур кьува чIавахьулу. Шикку сияхIрай бихьлай бур чил билаятирттал инсантал ва гражданство дакъами, кьамул буллай бур паспорт бакъа шаврил, баххана баврил ва цIусса паспорт ласаврил хIакъиравусса аьрзри, мукунма отделданул зузалтрал кьамул буллай бур сияхIрай бацIан ччисса ва сияхIрая букьан ччисса, республикалий зунсса патент ласун ччисса инсантал. Аьбдурашид МахIаммадовлул, Сергей Бачуриннул ва Сергей Карповлул ххал дунни отделданул къатри, цIухху-бусу бунни шикку зузиминнахь.
Шагьрулул шаннагу райондалийсса отделлу ца кIанттайн цачIун давриву хъуннасса къулайшиву дур агьалинан аьркинмур, ми тиху-шихун лечлачи къабувну, ялугьлагьи къабувну, ччясса чIумул мутталий ца кIанай щаллу бан бюхълай бур.
— Жул мурад вая. АрхIала цикссагу инсантал кьамул бувну, миннал масъалартту щаллу бан бюхъайсса гьарта-гьарзасса къатри даву. Жу щаллу дарду къулайсса шартIру шикку зузиминнан ва цала масъаларттал ялув минначIан букIлакIиминнан. Миграциялул къуллугърал зузалтрал паччахIлугърал хIаллихшиннарду щаллу дан хьхьичIра кунна арцу ласласисса ишру утти къахьунтIиссар, — увкунни Аьбдурашид МахIаммадовлул.
Ванал бувсунни ттиния тихуннай дан дакIниймуниягу.
Пикри бур октябрь зуруй Дагъусттаннай паччахIлугърал хIаллихшиннарду дуллалисса миграциялул масъаларттал управлениялул (УВМ) республикалул центр тIитIин.
КIулну бикIан, миграциялул масъаларттаха зузисса цIусса отдел дуссар Атаевлул цIанийсса кIичIираву, 7 «ж» къатраву.

А. Аьбдуллаева