МукьцIалла шин хъанай дур гьашину ХIажиева ПатIиматлул оьрчIал цIуллу-сагъшиврул ялув бавцIуну. Ва бур Дагъусттаннал лайкь хьу­сса хIакин, лаваймур категориялул хIакин.

З. Тахакьаева
1976 шинал Дагъусттаннал мединститутрал педиатриялул кIилчинсса выпуск къуртал бувну махъ, республикалул ОьрчIал больницалий интернатурагу бувккуну, 1977 шиная шинмай зий бур Лакрал райондалул азарханалий педиатрну. «Ттул захIматрал луттирай дурагу ца чичрур дусса», — тIий бур ПатIимат.
2005 шинайннин зий бивкIун бур участокрал педиатрну. Муния шинмай – райондалул педиатрну.
ЦIанакул райондалий усса ур 3154 оьрчI. Миннал цIуллу-сагъшиврул ялув зий ур 2 педиатр. Ца-ца педиатрнал аякьалулу усса ур 1580 оьрчI. ПатIиматлуйн багьлай бусса бур Буршиял, Ххюлуссуннал, КIулушацIрал, ЧIурттащиял, Хъурхърал, Щардал, ШавкIуллал ва Гъумучиял шяраваллавасса оьрчIру.
Яла гьарзану хьунадакьлай дусса дур бявкъу-гъили шаврицIун дархIусса къашайшивуртту. Жула кIанттайсса щинаву йод чанну бушиврийн бувну, чIявусса бусса бур ккарччив аьллалисса, зобрал къашайшиву дусса. Лякьлувара къюкIлил порок дусса 10 оьрчI усса ур сияхIрай. Вайннай, кIия-шама личIаннин, гьарцаннай бувну бусса бур операцияртту. Ччаруллал къашавайсса усса ур 12 оьрчI. Ми, пландалийн бувну, чIумуя-чIумуйн азарханалий уттубишин байсса бур, хасъсса кумаг аьркинсса чIумал тIайла буккайсса бур республикалул оьрчIал азарханалийн.

 

Азарханалул оьрчIал отделениялул хъунмур Сулайманова Милана. Вава бур ВицIхъиял махIлалийсса участокрал педиатргу. Лакрал райондалул азарханалий зий бур 1991 шиная шинмай.  ОьрчIал медсестра Мирзаева Жантин.

«Махъзуманив хъунна хъанай дур оьрчIал цIуллу-сагъшиврул ялув бацIаву. Жу буржлув буллай буру цинявппа оьрчIал диспансеризация дан. Профилактикалул диспансеризация дан ккаккан увну уссар школалийн гьаннинсса ва дуклакисса оьр­мулул 1151 оьрчI. Ххишала­сса къулагъас дуссар ятинсса ва опекунтурачIасса оьрчIах. Райондалий мукунсса 18 оьрчI ур. Вайнналгу щаллуну диспансеризация дурссар. 160 оьрчI уссар «Солнышко» оьрчIал багъраву ва Гъумучиял оьрчIал багъраву. Ялув бавцIуну буссару миннай цила чIумал прививкартту даврил. Ми идарарттацIун бавхIуну буссар медсестрахъул.
ХIакьинусса кьининийн 1151 оьрчIаяту ряхва зурул мутталий 600-ннай дурссар профилактикалул осмотр. Шин хьуннинсса оьрчIру тIурча, ххал байссар зуруя зуруйн, му чIумувун бияннинсса оьрчIру ччя-ччяни къашавай шайшиву хIисавравун лавсун.
Шанма зуруй цал лагай­ссару Бабаюртуллал райондалийсса къутаннайсса шяраваллавун оьрчIал диспансеризация дан. Азарханалул оьрчIал отделениялул хъунмур Сулайманова Миланал каялувшиндаралу, ттигъаннугу лавгссар жул хIакинтал республикалул азарханарттаясса пишакартуращал архIал. Ттуршуннийн бивсса оьрчIру ххал бувссар», — буслай бур ПатIимат.
Ванил бусласимунийн бувну, махъсса шиннардий райондалул азарханалий къавхьуну бусса бур вилттили оьрчI бивкIусса иш.
КIицI лаглай бур, хъунама хIакин АьвдурахIин Дибировлул хIарачатрацIух, хъунисса ремонтругу дурну, уттинин азарханалий къадиркIсса хIаллихшиннардугу дузал дуршиву.