Июль зурул 8-нний щалагу Аьрасатнаву кIицI ларгунни Кулпатрал, ччаврил ва имандалул кьини. Му Кьини чIарах гьан къадиртунни Каспийск шагьрулийгу. «Яхшихаш» тIисса Культуралул ва бигьалагаврил центрданий лахъа-хъунну кIицI ларгунни му байран.

Бадрижамал Аьлиева
Мунивух гьуртту хьунни Кулпатрал, нинушиврул ва оьрчIал ихтиярду дуруччаврил ДР-лул БакIчиначIасса вакил Марина Ежова, ДР-лул Жяматийсса Палаталул член, МахIачкъалаллал епархиялул секретарь отец Иоанн, Шагьрулул мажлисрал депутат Раиттин ХIасанов, Каспийскаллал шагьрулул ЗАГС-рал управлениялул начальник Татьяна Агъамирзаева, ДР-лул ОНК-лул член Мадина Темирова ва цаймигу.
Ва кьини шиккун оьвкуну бия 40-нния лирчусса шинну цачIу ялапар хъанай хьу­сса лас-щарнийн. Мукунминнавух бия Каспийск шагьрулия­сса АьвдурахIман ва Мая Мирзабековхъал, МахIачкъала шагьрулиясса Леонид ва Нина Подольскийхъал, Петр ва Елена Типаковхъал, Валерий ва Марина Кондратенкохъал, Сергей ва Елена Афанасьевхъал, Виктор ва Светлана Авиловхъал, Избербаш шагьрулиясса Виктор ва Елена Сарычевхъал, Хасавраясса Владимир ва Галина Кабанцовхъал кулпатру. Мукунма ва шадлугъравух гьуртту хьунни уттигъанну ташулул хьусса жагьилсса кулпатругу.
БавтIминнал хьхьичI бю­ххансса ва дакIний личIансса махъру лавхъуна «Аьрасатнал ниттихъул» суккушиндарал региондалул отделениялул хъунмур Таиса МахIаммадовал, Марина Ежовал, Зугьра Аьбдуллаевал, отец Иоаннул ва м.ц.
ЧIярусса шиннардий бавкьуну оьрму бутлатисса кулпатирттан дуллунни бахшишру, медаллу, грамотартту, тIутIив. Ахирданий, миннан цIа куну, ххуй-ххуйсса балайрду увкунни Дагъусттаннал эстрадалул балайчитурал.