Июньдалул 27-нний Ваччиял шяраву яхъанахъисса Муслимова Нурижатлул ужагърай хьунни кIива миллат, кIива тухум, кIива къатлул хъамал хьунабавкьусса лап авурсса мажлис. Ва хьунабакьаву хIисав дувангума бучIир инсантурал дянивсса аьдатру цIу лаган дуллалисса даврин. Муданмагу Дагъусттаннай цамур шяравасса, цамур миллатраясса инсан, хъамаличу кьамул аву, хъамалу аву, гьантта икIан уцаву къатлул залуннал ас-ламус лахъ буллалисса ишну хъанай бивкIссар. Гьантта икIайнигу, яла ххуйми, кIукIлуми шану-кIаралу дирчуну, тавханттуву уттуишин увайсса ивкIссар.

Утти бусанну ва хьунабакьаврил дайдихьу ча наниссарив.
Ккуллал райондалийсса Щуну-Зунттул кьиблалул чулийсса ца хъунмасса кюнтIуллуву хIасул хьуну дур 1-мур ЦIувкIуллал шяравалу. Ва шяраву яхъанай ивкIун ур Кьадиаьли тIисса адамина цала кулпат Аьйшатлущал. Вайннал наслуну хьуну бур шама арс ва кIива душ: Шарапуттин, СайдиахIмади, ХIажибутта, Зумрут, Нурижат.
Буслай бур Муслимова Нурижат:
— Ттул буттайн Кьадиаьли учайссия, ниттийн – Аьйшат. Ттул буттал буттайн, хъунмяммайн Сулайман, хъуннабавайн Мариян учайссия. Ниттил чулухасса ванил буттайн Мямма, хъуннабавайн Ххадижат учай­ссия. Уссурвал цIана сагъну ба­къар. Зумрут тIисса ссу, Ча­къаллал МахIаммадан щар хьуну, кIиккува, Чакъалив яхъанай бур. ХIажибутта тIима уссу зий ивкIссар конбайнарттай. Лавгссар зун Иракьнавун, Кувайтнавунгума. Ванал арсру, Альберт ва Рамазан, цала душваращал бур хIакьинусса жула мажлисрай гьуртту хъанай. Ттул бутта сайки 50 шинал мутталий зий ивкIссар СумбатIуллал лувсса Хъуннеххайсса гьарахъ гьарайзуну. Кку­ллал шяраваллил инсантал буслан бикIай цан ттул буттал чIявусса кумагру бувссар тIий. Хъамалгу жучIату чан къашайва. Ахъушиял райондалий­сса чIярусса шяраваллава хъамал бучIайва. Мурлатина тIисса шяравасса МахIмуд тIисса хъамаличугу, ванал ттун цIа дирзсса Нурижат тIисса душ ва вайннал тухумравасса 15 инсан ур бувкIун ттучIан. МахIмудлул буттава ивкIссар жул хъамаличу. Вана ва МахIмудлул душнин дур ттул цIа дирзун. На ниттищал лавгссара ца чIумал ва душ хъунма буван, ттуккуй азихъгу бивхьуну. Амма, жуща вайннал шяравалу лякъин къархьуну, махъунмай зана хьу­ссияв. Яла, аьпабиву, Хъун дяъвилул гьурттучи, Ваччиял шярава­сса гъаттарал хIакин Муслимов Юнуслун щар хьусса чIумал, лавг­ссару жу га душ хъунма буван. Га чIумал ва 10 класс къуртал буллалисса душ бия. Жу лавгссияв, жула ЦIувкIуллал махъсса Хурухи тIисса мащилийх хьуну, УАЗ машиналий. Рульданух уссия Каллаев Алик тIисса Ваччатусса адимина. Ттущал ялагу буссия ттул лас Юнус, ттула ссурахъил арс Гьарун, ттула ссу Зумрут. Мурлатина тIисса шяравалугу хъун дакъасса, 20-30 къатта бусса, дия. Жу бучIайхту щаллусса хъатIи бувна шяраву. Жухун байбизлайгума бия: «Зу куклу машиналий циван бувкIру, хъун машина бакъаяв? Жу зун булун къяча хIадур бувну буссиявхха», — тIий. Буллуна жун ссайгъатран ца хъунмасса ку.
Буслай ур жагьилмур Нурижатлул бутта МахIмуд:
— Жун ччянива бучIан ччан бикIайва жула хъамалу щар Ну­рижатлучIан. Амма, личIи-личIисса ишру багьана хъанай, бучIан къашайва. Вана утти ва зумадугьул зурул ахирданий бувкIру жула хъамаллурал аьдат цIу лаган дуван. Ттущал бувкIунни ттул оьр­мулул дус Сакинат, душ Нурижат, арс Ризван, ссурахъу ХIажи, арснал душ Жамиля ва цаймигу – жул тухумравасса 15 инсан.
Хъамал кьамул бувна Нурижатлул дарвазалул хьхьичI нацIу ччатIущал. Нурижатлул нех хъунна дуван, ванил чIарав бацIан, тя­хъашивуртту хIасул дуван бувкIун бия Ваччиял культуралул къатлул зузалт Оьмариева Аьишат, Суллуев Муслим,Ккуллал шяравасса ххаллилсса балайчи Гудов МахIад, Щардал шяравасса Амир, Нурижатлул ссу Чакъаллал Зумрут, уссил оьрчIру Альберт, Рамазан вайннал душру ва цаймигу Нурижатлул чIаххул, гъансса ва вихшалдарал инсантал.
Лакку ларзулусса мажлис бачин бувну ия Щардал Амир. Ши­кку лавхъуна махъру, дакIнийн бивчуна миллатирттал дянив­сса дусшиврий дарцIуну душиву дуниял ва ми жунна мудангу цIу дуккан дуллан ва ядуллан багьлагьишиву.
Буниялагу учала бур: «МитIи­кьукьул зунтту ттири­кIай­ссар», — тIисса. Ттун ванийну учин ччай бур – Ваччиял шяраву Нурижат гьуртту шай циняв тяхъашивурттавух, цичIанма хъамалу оьвчай байраннал кьинирдай чIаххуврайн, культуралул зузалт­райн, дус-ихтивартурайн. На, му мажлисрай ттухьхьунма махъ буллусса чIумал, дакIнийхтуну кIицI бувссия: «Ва НурижатлучIасса хьунабакьаву хъанахъиссар «миллатирттал дянивсса ишну, туку-мукунсса ишну бакъача, ххалуйх лаххансса ишну», — куну.
Хьунабакьаврил мажлис лахъи лавгуна ахттакьуннин.Ттугъ вихьри бусса, Нурижат!