Республикалул КIулшивуртту дулаврил ва элмулул министерствалул вай гьантрай дайдирхьуну дур «Зоны риска» тIисса федерал программалул лагрулийсса, гьашину ЕГЭ дулайни хьусса диялдакъашивурттацIун дархIусса даву.

З. АьбдурахIманова
Ва даврил мурадгу бур билаятрал школардай ЕГЭ кьамул дайни законну лиян дурсса иширттал хъирив багьну, гихунмайгу мукунсса ишру тикрал хьун къабитансса чаранну лякъинсса.
«НигьачIишиврул группалувун («группа риска») багьлагьиссар экзаменнава цания ца къадуллусса, циняр экзаменну дуллуну, сочинениялул лагьсса балл лавсъсса ягу оьрус мазрал экзамен 80 баллданун чирчуну, сочинение хьхьарану чирчусса, циняр экзаменнал шамуннияр ххишалану апелляциялийн буллусса дуклаки оьрчIру», — бувчIин буллай бур кIулшивуртту дулаврил аралул управлениялул хъунмур Ариза Багълиева.
Мукунма хъирив лаянтIий бур экзаменну дулайсса кIанттурдай сакиншинначитурал чулуха итххявхсса гъалатIирттал ва диялдакъашивурттал. Масалдаран, диялдакъашивурттавасса ца иш ласунну. Комиссиялул вакилтурал ягу сакиншинначитурал апелляциялул чIумал къабагьавай баллу лахъ бувну лякъирча, ми экзаменная арх бантIиссар.
«Жу дувару хъинну агьамсса ва хъуннасса даву Дагъусттаннай дуклаки оьрчIру ЕГЭ марцIну дуллали баншиврул. Хъуннасса къулагъас ва масъалалух дуллай ур Республикалул БакIчи Рамазан АьбдуллатIиповгу. ОьрчIангу, миннал нитти-буттангу бувчIин аьркинссар цайми хъяврин бувну, цанма хъинбала къахьунтIишиву. Школалий дуклай буна гьарнан кIулну бикIан аьркинссар дарсирдан харж дуван аьркиншиву цала дусса чIун», — буслай ур кIулшивуртту дулаврил ва элмулул министр Шагьаьппас Шагьов.
НигьачIишиврул группалул даврия махъсса хIасиллах бурувгун ххал дигьинтIиссар ЕГЭ-рай къахьун битансса гъалатIирттал план.