Ларгсса нюжмаркьини МахIачкъалалив Дагъус­ттаннал ПаччахIлугърал филармониялул гъинтнил залдануву хьунни Дунияллул халкьуннал конкурсирттал лауреат Халида Абуевал цила буттал ватандалий дуллалисса цалчинсса цилалусса концерт.

Зулайхат Тахакьаева
Концертрал программалун цIа дия «Джазрал лугъатрай­сса танго». Балайчинахун руцлай бия Дагъусттаннал халкьуннал артист МахIаммад Абакаровлул каялувшиндаралусса концертрал оркестр.
«ХIакьину ттухун руцлай бия гьамин ва темалуцIун бавкьусса оркестр. МахIаммад Абакаровичлул дурунни джазрал накьич дихьлахьисса танголул аранжировка. Танго цурдагу джазрал оркестрдануллихха даингу щаллу дайсса», — увкунни Халидал.
Бувну бур балайчи цIанихсса музыкантътурал кулпатраву. Ппу Мурад АхIмадович – скрипка бищу, Дагъусттаннал халкьуннал артист. Нину Зальмина Семеновна – пианист, Аьрасатнал кIулшиву дулаврил бусравсса зузала. Вайннал мукьвагу оьрчI, Сияна, Халида, Салман ва АхIмад, дунияллийн буккайхтува музыкалул ясир бувсса бур учай инсантурал. Сияна – концертмейстр ва композитор, Салман – джазрал трубач, АхIмадгу, музыкалува гьарчагу, цанма ххирасса тромбондалия щаллуну яувцун акъар.
Халидал къуртал бувну бур Одессаллал консерваториялул альталул класс. Ххюра шинай консерваториялуву альталий руцлай бивкIхьурчагу, дарсирдал ляхсса чIумал балайрду тIун бикIайсса бивкIун бур. Щиннив бавну, ххуй бивзун бия тIар цил балайрду. Ансамбльданущал цалчин балай увку­ссар тIий бур хаварбакъулий цила дусъсса душнил хъатIуй. ТачIав къакIулссар иш ци чулийнмай кIура баянтIиссарив. Ва базилух Халидал иш хъинчулийнмай кIурабавну бур. Зунттал темперамент, тIабиаьтрал дуллусса ххуйшиву ва такьва, авадан­сса чIу кувнницIун кув бавкьусса душ найбунува итталун багьну бур. ЦIубутIуй – музыкантътуран, яла – тамашачитуран. Одессаллал рестораннал «ВИА» группардащал зий, салкьи дурну дур цила дакIнил ларсъсса репертуар, цIубакъасса духьурчагу, халкьуннан тIалавсса «попса».
ХIакьсса школану ванин хьуну бур, мультфильмардаву ва радиорекламардаву балайрду тIий, байраннал шоурдаву пионер Петохлугу, даххухлугу, халкьуннан ххирасса «къачагъ генстеритолухлугу» балай тIий, мунищала архIал гьарца хьхьуну клубирттаву ва рестораннаву зузаву, рок-фестиваллай гьур­тту хъанахъаву.
Рестораннавусса балай­укултраягу, джазрал цIурттаягу лавхьхьуну бур 30-50-ку шиннардил классикалул джаз Элла Фитцджеральдлуйн ва Вадим Козиннуйн бияннинсса. Учай­сса бусса бур классикалул Сара Воаннул, Дайана Кроллул щаллу байсса кIукIлусса джазрал журалул балайрдугу. Ххира­сса бусса бур Халидан испаннал ва латиннал музыкагу. Мунияту бухьунссар ванища ттюнгъасса «парк чаир» музыкалия бигьанма фламенколул ритмардайнгу бучIан бюхъайсса. Мудан гьур­тту шайсса бур «VIVA ESPANA» тIисса фламенколул фестивальданий. 2005 шиная шинмай балайчи зий бусса бур «JVL Big Band» тIисса В. В. Лившицлул сакин дурсса Москавливсса джазрал балайрдал компаниялущал уртакьну, «Almasdelfuego» (фламенко) группалул балайчину ва «Eхsilados» (цыганнал ва балкьарнал музыкалул) группалул солисткану. ЦIанакул дуклай бусса бур ттизаманнул магьирлугърал институтраву эстрадалул ва джазрал артистнал пишакаршиву ласлай.
Халида Абуева хьуну бур Таллиннай хьусса Изабелла Юрьевал цIанийсса Дунияллул халкьуннал дянивсса оьруснал романсрал фестивальданий «За чистоту стиля» тIисса диплом цалчин лавсъсса лауреат.