ЦIуссалакрал райондалий сакин дурну дия «Дусшивруллу жува бувгьусса» тIисса аслийсса культуралул республикалул фестиваль

Уттара дурккун дия ЦIу­ссалакрал шяравалу. КIюрххила шиккун нех дирхьуну най бия машинартту. Шяраваллил майданнив бавтIун бия мухлукьат, баллай бия личIи-личIисса миллатирттал мазурдийсса ихтилатру. ХIадур бувну бия гьарица шяраваллил цала-цала майданну, тIивтIуну бия лакку дукрардал супрарду, дирзун дия нажагьссанначIа яхьусса нукIузаманнул самоварду, личIинура нахIусса дия кIалашрай дурсса чяй. ЛичIи-личIисса республикарттая, шагьрурдая, районная бувкIсса хъамаллураща бюхълай бия ччимур ккурандалух щябикIан.
Хъамал махIаттал буллай бия цIуссалакрал жяматрал буттал буттахъая шихуннай ядурсса, ва кьини ккаккиялун дуккан дур­сса, хьхьичIазаманнул тIахIни-кIичIулул, лаххи-ликкиялул. Майданнив дуккан дурну дия райондалул аслийсса культуралул центрданул экспонатру. ВайннучIа аглан къавхьуну, тамаша къабувну, цаягу хъамаличу къалагайва. ЧIирисса чIумул дянив хъуннасса даву дурну дия райондалул бакIчи ХIажи Айдиевлул каялувшиндаралу цIуссалакрал жяматрал. Райондалул центрданийсса паркраву бувну бия сахIна, тамашачитал щябикIансса кIанттурду, личIи бувну бия мюрщи циркачтуран­сса мурцIу.
ЦIуссалакрал райондалий сакин дурну дия «Дусшивруллу жува бувгьусса» тIисса аслий­сса культуралул республикалул фестиваль.
Фестивальданий гьуртту хьун бувкIун бия ЦIуссалакрал райондалущал уссурвалшиврийсса дахIаву дусса Къиримнал Сакскаллал райондалиясса, Ингушнал Сунженнал райондалиясса, Чачаннал Ножайюртуллал районнаясса делегацияр­тту, Дарбант, Къизлар, Хасавюрт, Дагогни шагьрурдаясса, Хасавюртуллал, Гумбетуллал, Буйнакскаллал, Казбекуллал, Лаващиял, Нугъайнал районнаясса творчествалул коллективрду.
Фестивальданийн бувкIун бия ДР-лул ХIукуматрал Председательнал хъиривчу Билал Оьма­ров, ДР-лул культуралул министр Зарема Буттаева, ДР-лул миллатрал политикалул министр Татьяна Гамалей хIаласса республикалул делегация.
Шадлугърал мажлис тIитI­лай, ихтилат бунни ЦIу­ссалак­рал райондалул бакI­чи ХIажи Айдиевлул.
— ХIакьину ЦIуссалакрал райондалий бавкьуну ялапар хъанай буссар лакрал, чачаннал, яруссаннал миллатру. На барчаллагьрай ура цинявннайн, дусшиврул арарду дуручлай тIий, буттахъал аьдатру ядуллай тIий. Хъунмасса барчаллагь тIий ура жул чIарав бацIан, жул кьини хъун дан бувкIсса хъамаллурахь, — куна ванал.
Дагъусттаннал БакIчи Рамазан АьбдуллатIиповлул цIания цинявппагу фестивальданий гьуртту хъанахъими барча бувна Зарема Буттаевал.
— Жулла республикалул бакI­чи­нал тIалавшиндарайн бувну, 2013 шиная шихунмай республикалул шагьрурдай ва районнай тIивтIуссар Аьрасатнал халкьуннал аслийсса культуралул центрду. ХIакьину ва сахIналий творчествалул коллективирттал ккаккан дурсса къавтIавуртту ва балайрдугу Дагъусттанналгу, Аьрасатналгу культуралул ирсирал ца агьамсса бутIану хъанахъиссар. Жунна ялун нанисса никиращал хъуннасса даву дуллан аьркинссар жула ирс ябан, культуралул зузалтрал хIарачат буллан аьркинссар ва давривун жагьилми кIункIу буллан, — увкуна ванил.
Ихтилатру ялагу бувна Къиримнал Сакскаллал райондалул бакIчи Николай Росоловскийл, Ингушнал Сунженнал райондалул депутатътурал советрал председатель ХIусман Умаровлул, Чачаннал Ножайюртуллал райондалул бакIчи Асланбаг Мужуруевлул.
Хъирив ЦIуссалакрал райондалул культуралул къатлул зузалтрал ккаккан дуруна лакрал миллатрал къавтIаву.
Цаннияр ца яргсса программартту хIадур дурну дия Къиримнавасса «Казачки», Ингушнавасса «Эзди» ансамбльлал, ЦIуссалакрал искусствалул школалул, Дагъусттаннал Огнилия­сса циркрал школалул ва мукунма цаймигу творчествалул коллективирттал.
Байрандалул мажлис бачин бувну ия ДР-лул лайкь хьусса артист Марат Тимохин. Хъамаллураха аякьалий бия дуклаки оьрчIая сакин бувсса волонтертурал группа.

Николай Росоловский, Къиримнал Сакскаллал райондалул бакIчи:
— КIира шинал хьхьичI ЦIу­ссалакрал райондалущал жу дурссия уссурвалшиврийсса ва дусшиврийсса кьутIирду. Сакскаллал райондалун 85 шин хъанахъисса юбилейрал мажлисрай гьуртту хьун бувкIун буссия ЦIуссалакрал райондалиясса хъунмасса делегация. Мукунма жугу гьуртту хьуссару Совет Союзрал кIийла Виричу АхIмад-хан Султаннун 85 шин шаврин хасну республикалий ва райондалий дуллалисса мероприятиярттай, бивссару Виричунал буттал шяравун. Къиримгу, Дагъусттан кунма, чIяву миллат­ру ялапар хъанахъисса регионни. Жува хъиннува цачIун бунну АхIмадхан Султаннул: мунал ца цIуку Дагъусттанналли, ца – Къиримналли. Зувинния ливчусса инсантал буссар хIакьину шикку жул райондалиясса. Щак бакъар жула дусшиву уттиния тихуннай хъиннура цIакь хьуншиврийн.

Тамара Леонова, Сакскаллал райондалул «Казачки» ансамбльданул солистка.
— Жул ансамбль сакин дурну 15 шин хъанахъиссар. Жу цалчинну Дагъусттаннайн бувкIсса. Барчаллагьрай буру, жуйнма шиккун оьвкуну тIий. Дагъус­ттаннал халкьунная ливчIунни хъамакъабитансса тIааьнсса асарду. Хъиннува ххуй бивзунни бакIрал ххуйсса оьрчIру-душру ва хъамал ххирасса инсантал.

Амирхан Амирханов, ДР-лул Халкьуннал Мажлисрал депутат:
— Ххаллилсса фестиваль хьунни. Шанна нюжмардул хьхьичI чIаххуврайсса Казбекуллал райондалий хьусса ца тIааьн бакъасса иширайн бувну, Рес­публикалул БакIчи Рамазан АьбдуллатIипов Казбекуллал райондалийнгу, ЦIуссалакрал райондалийнгу увкIун уссия. Му чIумал хIукмугу хьуссия рес­публикалийгу, республикалул кьатIувгу жува бавкьуну бушиву, жулла дянивсса дусшиву щищачIав лиян дан къашайшиву тасттикь буллалисса фестиваль дан. Хъуниминнан дакIнийн багьсса ва пикри укун ххаллил­сса мажлисрайну бартлавгунни. Умуд бур дусшиврул фестиваль аьдатравун дагьанссар тIисса.

Ширвани Мурадов, Олимпий чемпион:
— «Жува дусшивруллу бувгьусса» тIисса фестиваль, мяйжаннугу, миллатирттал дянив­сса дусшиврул арарду цIакь дуллалисса хьунни. Ва жура дуллали­сса даву хъун дан вайксса делегацияртту, творчествардал коллективрду бучIаву – му хъунма­сса ишри. Дагъусттаннал халкь оьрмулухун кувннащал кувгу, чIахху-чIарахминнащалгу бавкьуну, уссурвалшиврий ялапар хъанай бивкIссар ва уттиния тихунмайгу мукунма бикIан аьркинссар.

Батир Хамхаев, Ингушетиянал Халкьуннал Мажлисрал депутат:
— Нюжмардул хьхьичI ЦIу­ссалакрал райондалиясса делегация бувкIун буссия жучIан хъамалу. Му чIумал Ингушнал Сунженнал райондалул ва ЦIуссалакрал райондалул дянив чирчуссия хIала-гьурттушиврул кьутIирду. Утти жу бувкIун буру ва райондалий дуллалисса агьамсса мероприятиялий гьур­ттушинна дан. ЦIуссалакрал жяматрал жу хIурматрай кьамул бунну. КIул хьуру Дагъусттаннал миллатирттал культуралущал, багьу-бизулущал. Пикри бур цахъи хIаллай шиккува аглан хьунсса, уздансса Дагъусттаннал халкьуннащал хъиннува гъанну кIул хьунсса.

А. Аьбдуллаева,
И. Саидова