Июльданул 17-нний ДР-лул ХIукуматрал Председатель Аьбдуссамад ХIамидов ивунни МахIачкъалалив АхIмад-хан Султаннул проспектрай цIусса школа буллалисса кIанайн.

Ва школалул бикIан тIий бур 6 блок (дуккаву дачин дувайсса корпусру, спортзал, дуссукъатри, дукра дуваймур блок ва актовый зал). Ва бикIантIиссар 804 дуклаки оьрчIансса дуккаврил идара.
Дуллалисса давурттал ялтту увккун, Аьбдуссамад ХIамидовлул увкунни:
— На шикку ванияр зурул хьхьичIгу уссияв, зузалт цIакьнинияр чIяву хьуну бур, амма объект цила чIумал бувну къуртал хьуншиврул ми чIяву шаву къагьассар. Дур цила захIматшивуртту. Ва журалул школарду буллай кIирахъул шинну шай, му жун бувчIлай бур, амма укунсса жаваблувшиннарду зуйнна ларсния махъ, ми щаллу дувангу аьркинссар.
Школарду жу буллалиссару «Содействие созданию в субъектах Российской Федерации (исходя из прогнозируемой потребности) новых мест в общеобразовательных организациях» (2016-2025-ку шиннардий) цIанилусса федерал программалийн бувну. Вай давурттугу дуллалиссару 3 сменалий оьрчIру дуклакаву дакъа даншиврул. Махъа нанисса никирал хьхьичIсса жулла жаваблувшинна хъуннассар.
Объектру цила чIумал щаллу буллалаву жуйвасса буржри, ялун нанисса шинавугу ва программалул лагрулий цIусса школартту буллалавривух жулла региондалуща гьуртту хьун бюхъаншиврул, — куну.
Школалул къатри буллалисса, «Алан-Тревел» фирмалул генеральный директор МахIаммад ХIажимахIаммадовлущал ихтилат буллай, кIицI лавгунни школа буллалисса давурттаву ХIукуматрал чулуха аьркинсса кумаг бухьурча, чIарав бацIан хIадурну бушиву. М. ХIажимахIаммадовлулгу бувсунни ДР-лул ХIукуматрал Председатель шиккун зурул хьхьичI увкIния шинмай зузалт 60 инсанная 85 инсаннайн ияннин гьарза хьушиву, махъсса гьантрай тIурча, уттигу 30 зузула ялун иянтIишиву ва махъун дагьлагьисса давуртту хъирив лаян дувантIишиву.
Аьбдуссамад ХIамидовлул ахирданий бувсунни цIусса дуккаврил шин дайдишиннин цIусса 7 школа тIитIин хIадур хъанай бушиву аьмну 3706 дуклаки оьрчIансса: МахIачкъалалив «Ак-Гель» микрорайондалий (804 кIану бусса), Буйнакскаллал райондалий Лувмур Къазанищлив (534 кIану бусса), Сулайман-Стальскаллал райондалийсса Эминхюр шяраву (440 кIану бусса), Хивуллал райондалий Канцил шяраву (100 кIану бусса), Лаващиял райондалий Наскент шяраву (504 кIану), Тарумовкаллал райондалий Кузнецовка шяраву (100 кIану бусса), Каспийскалий (1224 кIану бусса).
Му бакъассагу, цIусса школартту буллалисса давуртту ва шинал най дуссар МахIачкъалалив «Эльтав» заводрал микрорайондалий (804 кIану бусса), МахIачкъалаллал 10-мур школалучIа 604 кIану бусса пристройкартту дуллай бур, мукунма цIусса школартту буллай бур Хасавюртуллал райондалийсса Карланюрт (500 кIану) ва Кадыротар (120 кIану бусса) шяраваллаву, МахIарамккантуллал райондалийсса Ярагъ-Казмаляр шяраву (320 кIану бусса) ва Къумтуркъалаллал райондалийсса Алмало шяраву (400 кIану бусса).

Бадрижамал Аьлиева