Июль зурул 17-нний Дагъусттаннал Виваллил иширттал министерствалий хьунни коллегиялул заседание.
Шикку гьуртту хьунни Аьрасатнал МВД-лул Агьаммур управлениялул Ухссавнил Ккавкказуллал федерал округрайсса хъунама, полициялул генерал-лейтенант Сергей Бачурин, Дагъусттаннал виваллил иширттал министр, полициялул генерал-лейтенант Аьбдурашид МахIаммадов, Дагъусттаннал БакIчи Рамазан АьбдуллатIипов, ДР-лул ХIукуматрал председательнал хъиривчу Рамазан ЖахIпаров, Дагъусттаннал Силистталул управлениялул Силистталул комитетрал хъунама Сергей Дубровин, Дагъусттаннал УФСБ-лул хъунама, генерал-майор Олег Усов, Дагъусттаннал прокурорнал хъиривчу Сергей Беляков, Нацгвардиялул управлениялул хъунама МахIаммад Баачилов, Мюхчаншиврул Советрал секретарь Абумуслим Абумуслимов, УФСИН-лул хъунама Муслим Даххаев, мукунма МВД-лул подразделениярттал каялувчитал ва кIантту-кIанттурдайсса отделлал хъуними.
ДачIи шинал лажиндарай дурмунил хIасиллу дуллай, Аьбдурашид МахIаммадовлул бувсунни ведомствалул ва чIумул мутталий диялсса даву дуршиву, кIицI лавгунни диялдакъашивурттугу. Дурмунил хIакъи-хIисав дуллалийни чIалай бур хъуннасса къулагъас дуллан багьлай бушиву экстремизмалуцIун ва терроризмалуцIун бавхIусса гьарица иширан ххуллу кьукьин. ХIакьинусса кьинисса республикалийсса тагьардания буслай, министрнал кIицI лавгунни миллатирттал дянив дичин кьаст лархIусса кIанттурду хьушиву.
Хъирив министерствалул дурсса давурттая гьарта-гьарзану бувсунни министрнал хъиривчу, полициялул хъунама Сергей Карповлул.
ДачIи шинал лажиндарай криминал ишру 15,5%-рал чан хьуну бур. Аьмну сияхIрайн ларсун дур 7882 тахсиркаршиву. КIусса, оьхIалсса тахсиркаршивуртту 4,2%-рал чан хьуну дур. Аьч дурну дур 6204 тахсиркаршиву. КIул увну ур ми дурсса 4690 инсан. Чан хьуну бур ихтиярду дуруччай органнал зузалтрал оьрмурдайн кьаст лархIусса ишру, къачагъшивуртту, хъямалашин, цурк бувсса, машинартту бавцусса ишру. 88,5%-райн дияннин гьаз хьуну дур тахсиркаршивуртту ашкара даву.
Ххуйсса ккаккиярттацIун диялдакъашивурттугу дур. Хьхьарану дур ивчIанна тIий инсан ивкIусса, къатравун бувххун цурк бувсса ишру ашкара баву. Цала ихтилатраву Сергей Карповлул гьаз бунни мукунма наркотикру ва ярагъ закондалуцIун къабавкьуну ишакаш баврил масъала. КIицI ларгсса чIумул дянив закондалуцIун къабавкьуну ярагъ ишакаш баврицIун дархIусса 1116 тахсиркаршиву ашкара дурну дур. Зевххуну бур 164 битай ярагъ, 31 автомат, 3 пулемет, 11 гранатомет, 63 пистолет.
Дагъусттаннал БакIчи Рамазан АьбдуллатIиповлул барчаллагь увкунни Республикалул виваллил иширттал министерствалухь дуллалисса хъуннасса даврихлу, кIицI лавгунни хIакьину миннаща бюхълай бушиву агьалинал мюхчаншиву дузал дан, тахсиркаршивуртту чан дан ва мунийну республикалул сий гьаз дан. Диялдакъашивурттая тIий, Республикалул БакIчинал кIицI лавгунни ххуллурдайсса мюхчаншиврул масъала. Сергей Бачуриннул бувсунни республикалийсса тагьар бигьасса дакъашиву, амма канила дуккансса нигьачIаву дакъашиву.
— ЧIявуми масъаларттаву ххуйсса ккаккияртту чIалачIи дан бювхъунни. Чан хьунни ашкара къадурсса тахсиркаршивуртту. 10%-рал чан хьунни сияхIрайн ларсъсса тахсиркаршивуртту, 13%-рал – цурк бувсса ишру, 25%-рал – машинартту бавцусса (угон) ишру. ЧIяву хьунни экономикалуцIун дархIусса тахсиркаршивуртту ашкара дурсса ишру, — увкунни С. Бачуриннул. Ванал бувсунни зузалтрал хъуннасса даву дуллай бушиву ярагъуннищалсса къачагътурал кьюкьран арцурду дуллалисса ва кабакьу буллалисса кIанттурду ашкара бан, ДТП-тту хьун къаритан, закондалуцIун къабавкьуну ярагъ ишакаш баврин ххуллу кьукьин.
Ихтилатру къуртал хьуну махъ Сергей Бачуриннул ва Аьбдурашид МахIаммадовлул къучагъшиврухлу ва къуллугърал буржру дакI марцIну бартбигьлагьаврихлу хьхьичIунсса зузалтран дуллунни паччахIлугърал ва ведомствалул наградартту, грамотартту, барчаллагьрал чагъарду.

Дагъусттаннал МВД-лул пресс-служба

ХIадур бувссар А. Аьбдуллаевал