Июнь зурул 17-нний ЦIу­ссалакрал райондалул администрациялул къат­раву хьунни ЦIуминалийн бизан буллалисса агьалинал хIакъиравусса батIаву.

Шикку ххал бигьлагьисса масъалартту бия нукIувасса къатрал заллухъруннан къат­ри зана битаврин, бивзун наниминнан компенсацияртту булаврин ва цIусса миналийсса къатраву шартIру дузал даврин хас бувсса.
Ва батIаврий гьуртту хьунни ДР-лул Бизан баврил масъалартталсса буллалисса управлениялул хъунама МахIаммадаьли МахIаммадаьлиев, ЦIуссалакрал райондалул бакIчи ХIажи Айдиев, ЦIуссалакрал райондалул Бизан баврил масъалартталсса буллалисса управлениялул хъунаманал хъиривчу МахIмад Антаев ва шяраваллал администрациярттал вакилтал.
Бизан бувасса ЦIуссалакрал райондалул агьулданун бувчIин бунни хьхьичIавасса заллухъруннал къатри кьадитан аьркиншиву ва ккаккан дурсса чIумул мутталий ЦIуминалий дурсса къатравун бизан багьлай бушиву.
Бизан баврил масъалар­тталсса буллалисса комиссиялул члентурал бувчIин бунни ЦIуминалийн бизлазиминнан дулайсса арцу так цIусса къатравун бивзун махъ дуллантIишиву.
Мукунма ва комиссиялул члентурал бувсунни 1944 шиная шихуннай дурну диркIсса къат­ри кьадиртминнан компенсацияртту буллансса талонну дулун ккаккан дурну душиву.
Ялув кIицI лавгсса масъалар­тту бакъассагу, ва батIаврий агьалинал кIицI ларгунни чIярусса цаймигу тIалавшиннарду. Комиссиялул члентуралгу къулагъасрайн лавсунни шикку агьалинал сукку бувсса цинявппагу масъалартту.