ЦIуллушиву дуруччаврил зузалал кьинилун хас дурсса тяхъашивуртту, медициналул зузалт барча баву ва медсестрахъал дянивсса конкурсру хьуна июньдалул 30-нний Ваччавсса Культуралул къатлуву.

Азарханалул хъунама хIакин Сулайманов Сулайманнул барча бувна цала зузалт ва бувсуна райондалийсса жяматрал цIуллу-сагъшиву дуруччаврил ялув цукун бавцIуну буссарив. ЦIуллушиву дуруччаврил зузалт барча бувна мукунма райондалул бакIчинал хъиривчу Илиясова Сабринал, Дагъусттаннал БакIчинал зунттал районнай_сса вакилнал хъиривма СалихIов Аздардул. Муния махъ дуллуна ЦIуллу-сагъшиву дуруччаврил министерствалул, райондалул администрациялул чулухасса ва райондалул азарханалул хъунама хIакиннал чулухасса грамотартту. Миннавух бия хIакинтал ва медсестра­хъул: Буржунов Рашид, Кьубатаев Аьли, Асланбекова ПатIимат, Кьадиева КьурбанпатIимат, АьвдурахIманова Сиясат, Чаринова Сиясат, Аьшаев Нуруллагь, Шамхалов Гьарун, Шамхалов Кьурбан ва цаймигу зузалт.
Гания гихунмай мукьра командалул – Ккуллал шяраваллил азарханалул, Ваччавсса поликлиникалул, стационар отделениялул, шяраваллавусса ФАП-ирттал медсестрахъал – дянив байбивхьуна 10 журалул конкурсру: «повязка», «пластический хирург», «пеленание малыша», «узнай запах лекарств», «а ну-ка, капитаны», «взаимопомощь», «переливание воды грушой», «игра слов», «домашнее задание», «мастерство кухни». Конкурсирттал лях-карах культуралул зузалтрал ккаккан дурна къавтIавуртту, увкуна балайрду. Миннавух бия: Вихьуллал къавтIалт, Дагъусттаннал балайчитал Муъминат Юсупова ва Ямлихан ХIажиев, Гриша Ванатиев, Шавлухъ СалихIова ва цаймигу къавтIалт ва балайчитал.
Конкурсрал ахирданий кIул хьуна цумур командалул цумур кIану бувгьуссарив: 1-мур – Ккуллал шяраваллил азарханалул, 2-мур – поликлиникалул, 3-мур – стационарданул, 4-мур – ФАП-рал.