Шагьрулия зунттавун, зунттавату шагьрулийн пассажиртал бувцуну заназисса шофертурал кушу, бигьасса бакъахьурчагу, бусравсса бур. Хъунмур къабигьашивугу дархIуну дур дуламанттул хъирив дуламан нанисса зунттал дарардал ххуллурдацIун.Ми ххуллурдайх зананшиврулгу хъуннасса чувшивугу, сисавугу дикIан багьлай бур.
ЧIярусса шиннардий пассажиртал Каспийскалия Ккуллал райондалийн (Къяннал шяравун) ялавайгу, лавайгу бувцуну занай ур хъинну дакI хъинсса, инсаннан хъинбала цукун буван хъиннивав тIисса дакIнил заллу Шихамиров Исмяил.
Ялагу Исмяил кунмасса шофертурал дур хъиннура ххуйсса хасиятгу. Вайннал цаннал гаманал машиналий щяивтма багьа къалавсун уцайссагу дур аьдат. Мукун ттул кулпат Каспийскалия Дарбантлив бия уква бувцуну. Укунсса чIумал, хъярчирай кунма, учайсса махъру бур жула лакрал: «Бувмур, зана битан къахьурча, дакIния лаган къабитанна»,- тIисса. Шиккува ххи буван ччива ялагу, Исмяиллул Ваччату цала шяраваллил чулийнмай нанисса, цала иширттай Ваччав бувкIсса инсанталгу уквари буцайсса.
ЦIуллу аннав ина, Исмяил, инсантуран мукун хъинбалартту буллан. Ина буллалимур Аллагьнангу чIалачIиссар. Му вил кулпатрал бакIраятусса цадакьану хъанахъиссар. Мукун хъанахъиссар хъиннува ва зумаритавал зуруйгу.

ХIажимурад ХIусайнов

Суратрай: Шихамиров Исмяил