Каспийскалий ЦБС-рай тIивтIусса «Яхши-хаш» цIанилусса клубраву уттигъанну хьунни оьруснал хъунасса шаэр А. Пушкин дунияллийн увксса июньдалул 6-мур кьинилун ва июньдалул 12-нний щалва билаятрай кIицI лагайсса Аьрасатнал Кьинилун хас дурсса батIаву.

ЦБС-рал хъунмур библиограф Зугьра Аьбдуллаевал бувсунни июньдалул 12-нний кIицI лагайсса байрандалул хIакъираву. ДакIнийн бивчунни Пушкиннул оьрмулувасса хIазсса ишру.
Гьарца шинал июль зурул цалчинмур ххуллункьини кIицI лагайсса Ф. Достоевскийл Кьинигу ялун най душиву хIисавравун лавсун, бувсунни мукунма оьруснал хъунасса чичул оьрмулия ва творчествалиягу.
БатIаврий цалва гьунарду ккаккан бунни КЦСОН-лул ветерантурал хорданул, 1-мур оьрчIал багърал мюрщултрал.
Ва кьини мукунма барча буллай бия ЦСОН-лул зузалтгу, цалгу июньдалул 8-нний кIицI лагайсса пишакаршиврул байран.

Бадрижамал Аьлиева