Гьарца шинал майрал 24-нний кIицI лагай Славяннал чичрулул кьини. Ва Кьини Аьрасатнаву кIицI лаглагиссар 1863 шиная шиннай. 1991 шинал ва байрандалун дуллуну дур паччахIлугърал статус.

ХIакьинусса кьини ва байран кIицI лаглай бур Аьрасатнаву ва дунияллул 12 билаят­рай ялагу. Чув кIицI лагларчагу, чара бакъа дакIнийн бичлай бур уссурвал Кирилл ва Мефодий, цалгу славяннал чичрулул гьану бивзсса.
Майрал 23-нний Республикалул Оьрус мазрал ва культуралул центрданул дунни му Кьинилун хас дурсса шадлугъ. Му цурдагу хьунни ДР-лул Миллатрал политикалул министерствалул конференц-залдануву.
Шадлугърайн оьвкуну бия цикссагу шиннардий оьрус мазрал ва литературалул дарсру дихьлахьисса, цалва оьрму ва элмулун хас бувсса учительтурайн. Миннал бувсунни бавтIминнахь цалва хасну му пиша циван язи бувгьуссарив, муниву цукунсса захIматшивуртту хьунадакьлай дуссарив.
Шадлугъравух гьуртту хьунни ДГУ-рал филологиялул факультетрал студентъталгу.
Республикалул районная ва шагьрурдая бувкIсса лайкь хьусса учительтуран чIярусса бахшишругу дунни.

* * *
Славяннал чичрулул кьини дуллалисса давур­ттал лагрулий, Республикалул Оьрус мазрал ва культуралул центрданул зузалт бивунни МахIачкъала шагьрулул 5-мур школа-лицейравун. Школалий дуклай хъунма хIал къавхьу­сса мюрщултращал дуруна мюнпатрайсса хьунабакьаву, бувсуна миннахь оьрус азбукалул тарихрая, хьуна личIи-личIисса интерактив тIуркIурду, презентацияртту, ихтилатру. Ва кьини оьрчIан кIул хьунни цикссагу хIазсса ва цала аькьлу-кIулшилун мюнпатрансса зат­ру.
Ахирданий гьарцагу чIи­витIун бахшишну хьуна Аьра­сатнал оьрчIал чичултрал ва шаэртурал луттирду, Аьрасатнал паччахIлугърал лишангу дусса.

ХIадур бувссар
Бадрижамал Аьлиевал