Нюжмар дакIний лирчIунни…

Ссайну дакIний лирчIри вин ларгсса нюжмар?
Укунсса суал ва мунинсса жавабру рищару жу лях-карах «Илчилий».
Цанни инсантал гьарца кьини укун якъахъанахъисса?

Муслимат СултанахIмадова, Москавлив ялапар хъанахъисса:
— Ларгсса нюжмар дакIний лирчIунни бусурманнал ца яла бусравмур – Зумаритавал байран кIицI лагаврийну. Гъинтнил барз цуппагу бия дюхлулсса, лях-карах гъараллу лачIлачIисса, зумарду дургьусса инсантуран цIа куну Заннал цалва гьан бувсса. Муданма кунма, гьашинугу ссавур дакъа ялугьлай бивкIру байрандалул кьини баян буваннин. Рамазан зуруй хIатталлийн цала гъан-маччанах алхIам буккин къалагайсса цуя ца инсан акъахьун­ссар. Ми гьантрай нех дирхьусса машинартту бачай шяраваллавун. Гьашинугу ттула буттал шяравун бучIансса каши-кьудрат шаврийн щукрулий бура. ХIат-хIисав да­къасса машинарттал кьюкьри най дия шяраваллавун Зумаритавал байран кIицI лаган.
Москавлия МахIачкъалалийн бувкIсса гьантрай махIаттал хьунсса тамансса ишру хIисав хьуна. Маршруткалуву нанисса хъамитайпалул хIакьину на зух цинявннахлу арцу дуллай бура куну, дуллуну арцугу, бувккун лавгуна, цамунил «жучIа хIакьину ччатI уква­ссар» увкунни. Зума итадакьин шаппай чIал хъанахъисса инсантуран щин дуллай, чассагру бачIлай бия, мизитирттал хIаятирттавугу зума итадакьлакьи­сса инсантуран ссупрарду тIивтIуну бия. «Вай инсантал мудан укун, кувн­нащал кув иминну, нахIуну ялапар хъананшиврул цири дахчилачисса?» — тIисса пикрирду загьир хъанай бия.
Шяравун бивсса чIумалгу, чIалай бия Рамазан зурул бияла хъунмасса бушиву. Уттара дурккун дия щар, лавхъун бия чирахъру цинявппа ужагъирттай. Инсантал бия ва буниялагусса ссихIирданул барз къуртал къашайссания тIий.

«Анаварсса кумаграл» щупирнал къучагъсса къел

ХIурия ХIусайнова, «Анавар кумаграл» хIакин:
— Ларгсса нюжмардий на бу­ссияв «Анавар кумаграл» машиналий, къашайшалал оьвкуну, най. Ца ппурттуву, Октябрьданул цIанийсса къанаврал чIарав машинагу бацIан бувну, жул шофер анаварну чуннив левчуну лавгуна. Мунан ккав­ккун ия 6 шинавусса оьрчI къанаврал лавсун най. Шофер га ссят ххяв­ххун, къанаврава личин унни оьвкьун лагавайсса оьрчI. Хха­ссал увну махъ оьрчIан аьркин­сса медициналул кумаг-гу бувну, сагъ-саламатну иян уварду га цала нитти-буттачIан. Ва ишгу хьунни мубараксса Рамазан зурул гьантрай. ДР-лул ЦIуллу-сагъшиврул министр Танка Ибрагьимовлул, циняв­ппагу бавтIун, шофернал дур­сса даврин лавайсса кьимат бивщуну, хъунмасса барчаллагь баян бунни, дуллунни хIурматрал грамота. Виричусса даву дур­сса, оьрчIал оьрму ххассал був­сса «Анавар кумаграл» щупир МахIаммадов Марат цувагу ур Лакрал райондалийсса КIямашрал шярава­сса инсан.
Марат цуварив ур, цал цу­кунчIавсса гьунар къабав, цан кIанай цума-цанналгу ххассал увантIиссия оьвкьун нанисса инсан тIий, пахру-ххара къабуллай.
Укунминнал дурсса давур­ттая тIурчарив, цинявннан кIулну бикIан аьркинссар.
Ххассал увсса оьрчIал оьрмулувугу ва кьини мудан дакIний личIантIиссар.
И. Саидова