Низам лирсса ишру хьуну бакъар

ДР-лул КIулшивуртту дулаврил ва элмулул министерствалул пресс-службалул бусаврийну, республикалий биологиялул ва чил мазурдил Цасса паччахIлугърал экзамен дуллуну дур 5 азараксса дуклаки оьрчIал.
Экзаменну дуллуну дур 57 кIанай, 200 жяматийсса ялувбацIултгу гьурттуну. Аьрзри чивчусса 5879 дуклаки оьрчIава биологиялул ЕГЭ дуллуну дур 4599 оьрчIал. Экзамен дуллушиврул тасттикьшиндаран вайннан ласун ккаккан бувну бивкIссар 36 балл.
Чил мазурдил экзамен дулун аьрзри буллусса 585 оьрчIава 357 оьрчIал дуллуну дур му. Аьмну вайксса оьрчIава мукьуннал дуллуну дур паланг мазрал экзамен ва цаннал немец мазралмур.
Ккаккан дурсса 3 ссятрал мутталий оьрчIая тIалавну бивкIссар 40 задание дуван. Чил мазурдил ЕГЭ-лий ласун ккакан бувсса яла лагьмур 22 балл бур. Июньдалул 15-16-нний оьрчIал вара экзамендалул дакIнихмур бутIа буллуссар.
ДР-лул кIулшивуртту дулаврил министр Ш. Шагьовлул бусаврийну, гьашину ттинин дуллусса экзаменнай республикалул школарттай низам лирсса ишру хьуну бакъар. Мукуна министр маслихIат буллай ур дуклаки оьрчIахь цалла давурттал хIакъираву, багьлай бухьурча, нигьа къабувсун, апелляциялийн булун. Мукунсса сисаврилгу цала баллал ялунссагу баллу ххи бантIишиву буслай ур ва.
Шиккува ххи бан, экзаменнал хIасиллу кIул хьунтIиссар июньдалул 30-нния тихуннай.

З. АьбдурахIманова