Мабитару ятинтал ятинталну

Хъуннасса шадлугъ дия ОьрчIру буруччаврил кьини Лакрал райондалийгу. Байран хIадур дурну дия райондалул кIулшиву дулаврил ва магьирлугърал идарарттал оьрчIащалсса даврил отделданущал цачIуну.

Муний гьуртту хьунни райондалул бакIчитал, идарарттал хъуними.
Лакрал райондалул бакIчи Юсуп МахIаммадовлул бувсунни хIакьинусса кьини райондалий бакъашиву ургала акъа ливчIсса оьрчIру. Ятинсса оьрчIру цинявппагу бушиву опекунтурал аякьалийн лавсун. ЧIявусса оьрчIру бусса кулпатру райондалий бусса бур 300-нния ливчусса. 2015-2016 дуккаврил шинал билаятрал личIи-личIисса лагерьдай бигьалаган тIайла бувккун бур 60-ннийн бивсса оьрчIру. Микссава тIайла буккан тIий бур гьашинугу. Бувсунни гьунар бусса, итххявхсса оьрчIансса кабакьулун райондалий уква зий бушиву магьирлугърал, оьрчIал творчествалул ва спортрал школартту. Минналгу, республикалул личIи-личIисса конкурсирдай, олимпиадарттай, турнирдай хьхьичIунсса кIанттурду бугьлай, лахъ дуллай бушиву райондалул цIа. Барчаллагь увкуна, цала гражданшиврул ва пишакаршиврул бурж биттур буллай, ялун нанисса ник тарбия давриву захIмат бихьлахьиминнахь.
Райондалул ялув бацIаврил ва аякьалул отделданул пишакар Къисттаман Къюннуевал бувсунни шиная-шинайн чан хъанай бушиву нитти-буттал аякьалий бакъасса оьрчIру, агарда 2009 шинал сияхIрай ивкIхьурча 33, гьашину ур 13. ДукIу ва гьашину паччахIлугърал чулуха къатри ласунсса кумаг бувну бур ятинсса 5 оьрчIан. Ятинсса ва нитти-буттал аякьалулу бакъасса оьрчIах райондалул каялувчитурал чулухагу дагьайсса къулагъас душиврий чIурчIав дуллай, ванил барчаллагь увкунни Юсуп МахIаммадовлухь, ГьунчIукьатIрал шяраватусса АхIмадова Маржанат Дагъусттаннал паччахIлугърал медучилищалийн дуклан буххан кумаггу бувну, му къуртал бувну махъ райондалул поликлиникалий даврил щаллу баврихлу.
Байрандалийн бувкIми цала гьунардайну барча бунни Гъумучиял школалул ва магьирлугърал школалул дуклаки оьрчIал.

Зулайхат Тахакьаева