Дагъусттанннал агьалинал «Инсан» тIисса ихIсандалул фондрал хIарачатрацIух Сириянал агьалинал кумагран бавтIуну бур 11 миллион арцул ва 60 тонна дуки — хIачIиялул.

Гуманитар кумагращал Сириянавун лавгссар Дагъусттаннал динийсса идарарттащал зузисса Комитетрал хъунама МахIаммад АьбдурахIманов, Муфтиятрал отделданул хъунама Шихабуттин ХIусайнов ва «Инсан» фондрал гендиректор Казим Темирбулатов хIаласса дагъусттаннал делегация.«Сириянал вакилтуран маслихIат бувссия, дагъусттаннал оьрчIал лагерьдайн бигьалаган оьрчIру тIайла буккияра куну, амма Сириянал хъуниминнал баян бувна, тийх захIматсса тагьар духьукун, оьрчIру Дагъусттаннайн тIайла буккан бигьану бакъашиву. Муния махъ Дагъусттаннал ХIукуматрал ва динийсса иширтталсса буллалисса Комитетрал хIукму бувссия арцуйнусса ва дуки-хIачIиялийнусса кумаг буван»- тIий ур М. АьбдурахIманов. Июнь зурул 19-нний дагъусттаннал делегация Дамаскрал аэропортрай хIурматрай хьунабавкьуну бур Сириянал диндалул иширтталсса буллалисса министрнал хъиривчу, щайх АхIмад аль- Каббанийл ва Дамаскрал региондалул диндалул давурттал председатель ,щайх Худар Шахрурдул.

П. Рамазанова